اسلام آباد (عامر رفیق بٹ) اسلامی جمہوریہ پاکستان میں فیڈرل ڈیموکریٹک ریپبلک آف ایتھوپیا کے سفیرجمال بیکر عبد اللہ نے جمعرات کے روز سیکرٹری ہوا بازی سیف انجم سےملاقات کی۔
دونوں شخصیات نے ہوا بازی کے شعبے میں پاکستان کے ساتھ مستقبل میں تعاون کے ممکنہ شعبوں پر تبادلہ خیال کیا۔
دونوں اطراف نے ہوا بازی کے شعبے میں علم کے تبادلے اور ٹیکنالوجی کی منتقلی کے لیے دو طرفہ تعاون سمیت باہمی دلچسپی کے امور پر تفصیلی تبادلہ
خیال کیا۔
اس موقع پر سفیر جمال بیکر عبد اللہ نے کراچی میں ایتھوپیئن ایئرلائنز کے آپریشنز کے آغاز میں حکومت پاکستان کی جانب سے فراہم کردہ اہم تعاون پر اظہار تشکر کیا۔
سفیر نے سیکرٹری کو ایتھوپیا کی ایئرلائنز کی جانب سے پاکستان کی “لُک افریقہ اور انگیج افریقہ” پالیسیوں کے موثر نفاذ میں اہم کردار کے بارے میں آگاہ کیا جس کا مقصد حکومت سے حکومت، عوام سے عوام اور کاروبار کے درمیان تعلقات کو مضبوط بنانا تھا۔
انہوں نے پاکستانی عوام میں ایتھوپین ایئر لائنز کی بڑھتی ہوئی مقبولیت پر بھی روشنی ڈالی جو دنیا کی سب سے بڑی ایئر لائنز میں سے ایک بننے جا رہی ہے۔
دوسری جانب وفاقی سیکرٹری برائے ہوا بازی سیف انجم نے افریقہ کو پاکستان کے قریب لانے میں ایتھوپیئن ایئرلائنز کے اہم کردار کا اعتراف کیا اور سفیر کو ایوی ایشن کے شعبے میں دوطرفہ تعاون کو آگے بڑھانے میں اپنے ادارے کے تعاون کا یقین دلایا۔
