اسلام آباد( سٹاف رپورٹر)ترجمان نیشنل ہائی وے اتھارٹی کے مطابق حالیہ شدید بارشوں اور سیلاب کے دنوں میں این ایچ اے انتظامیہ سڑکوں پر ٹریفک کو بحال رکھنے میں مصروف عمل ہے۔ چئیرمین این ایچ اے ارشد مجید مہمند کی ہدایات پر نیشنل ہائی وے اتھارٹی کی تمام توانائیاں اور وسائل سڑکوں کی بحالی پر صرف کئے جا رہے ہیں۔ ملک کے بیشتر حصوں میں این ایچ اے نیٹ ورک ٹریفک کےلئے بحال ہے۔ اس حوالے سے ملک بھر میں حساس مقامات پر این ایچ اے کا عملہ اور مشینری مصروف عمل ہے۔ شاہراہِ قراقرم پر چند مقامات لینڈ سلائیڈنگ کے سبب بند ہیں ۔ پاک فوج کی مدد سے لینڈ سلائیڈنگ کا ملبہ صاف کیا جا رہا ہے، شاہراہ جلد ہر قسم کی ٹریفک کے لئے بحال ہو جائے گی۔گلگت بلتستان میں گیتی داس سے زیرو پوائنٹ (چلاس ) کے مقام سے برف ہٹائی جا رہی ہے جبکہ گلگت بلتستان کی بقیہ سڑکیں ٹریفک کے لئے کھلی ہیں اسی طرح خیبرپختونخواہ میں بیشتر شاہراہیں ٹریفک کے لئے بحال کی جا چکی ہیں ۔ کاغان- گیتی داس کے مقام پر شدید برفباری کے باعث سڑک ہر قسم کی ٹریفک کے لئے بند ہو چکی ہے۔ برف ہٹانے کا کام موسم کی شدت کم ہونے پر شروع کیا جائے گا۔شمالی اور جنوبی بلوچستان میں این ایچ اے روڈ نیٹ ورک پر ٹریفک معمول کے مطابق رواں دواں ہے۔
روڈ انفراسٹرکچر کو بہترین حالت میں رکھنے کے لئے این ایچ اے کے تمام علاقائی دفاتر میں کنٹرول رومز قائم کر دئیے گئے ہیں۔ جہاں گردونواح کی موسمی اور شاہراتی صورتحال کی لمحہ بہ لمحہ معلومات کی مانیٹرنگ کی جارہی ہے۔صورتحال کے مطابق اعلیٰ حکام ہدایات جاری کر رہے ہیں ۔
اس سلسلے میں عوام سے اپیل کی جاتی ہے کہ غیر ضروری طور پر خطرے سے دوچار علاقوں کی طرف سفر سے گریز کریں۔ این ایچ اے خراب موسمی حالات میں اپنے روڈ نیٹ ورک کو بحال رکھنے کےلئے تمام ضروری اقدامات کر چکا ہے ، افسران اور فیلڈ عملےکی چھٹیاں منسوخ کر دی گئیں ہیں ۔