لاہور(نیوزڈیسک)امریکا نے غربت کے خاتمے اور اقتصادی ترقی کے لیے پنجاب حکومت کے ساتھ مزید کام کرنے کی خواہش کا اظہار کیا ہے جس کے جواب میں وزیر اعلیٰ پنجاب مریم نواز کا کہنا ہے کہ زراعت اور صنعت سمیت آئی ٹی کے شعبوں میں امریکی اشتراک کار کا خیر مقدم کریں گے ۔
تفصیلات کے مطابق پاکستان میں تعینات امریکی سفیر ڈونلڈ بلوم نے وزیر اعلیٰ پنجاب مریم نواز سے ملاقات میں انہیں پہلی خاتون وزیر اعلیٰ پنجاب منتخب ہونے پر مبارکباد دی اور عوام دوست منصوبوں پر تیزی سے عملدرآمد کروانے کے ضمن میں ان کی کاوشوں کو سراہا۔
ملاقات کے دوران امریکی سفیر ڈونلڈ بلوم کا کہنا تھا کہ وزیراعلیٰ مریم نواز کی عوامی فلاح و بہبود کے منصوبوں میں خصوصی دلچسپی قابل ستائش ہے، امریکا غربت کے خاتمے اور اقتصادی ترقی کے لیے پنجاب حکومت کے ساتھ مزید کام کرنا چاہتاہے۔
مریم نواز کا کہنا تھا کہ امریکا اور پاکستان کے اقتصادی تعلقات دہائیوں پر محیط ہیں، پنجاب میں امریکی سرمایہ کاری کے لیے محفوظ ماحول فراہم کریں گے، پنجاب میں سرمایہ کاری کا پوٹینشل موجود ہے، زراعت، صنعت اور آئی ٹی کے شعبوں میں امریکی اشتراک کار کا خیر مقدم کریں گے۔
وزیر اعلیٰ پنجاب پاکستان کو معاشی بحران سے ایک مستحکم حکومت ہی نکال سکتی ہے، عوام کو معیاری تعلیم، صحت کی سہولیات اور سستی روٹی فراہم کرنے کے لیے جامع حکمت عملی مرتب کی ہے۔
’حکومتی معاشی پالیسیوں سے مہنگائی میں کمی آ رہی ہے، عوام کو بنیادی حقوق اور بنیادی ضروریات کی فراہمی ہر صورت یقینی بنائیں گے۔‘
