اسلام آباد(نیوز ڈیسک) پاکستان اور آذربائیجان کے تعلقات مذہب و ثقافت، تہذیب و تمدن اور اقدار و روایات کے مثالی اور مضبوط رشتوں میں بندھے ہوئے ہیں، وسطی ایشیائی سریاستوں سے ہمارا چولی دامن کا ساتھ ہے ان خیالات کا اظہار وفاقی وزیر مواصلات عبد العلیم خان نے آذربائیجان کے پاکستان میں تعینات سفیر مسٹرخضر فرہادوف سے گفتگو کرتے ہوئے کیا جنہوں نے آج وزارت مواصلات میں وفاقی وزیر سے خصوصی ملاقات کی،جہاں ان کا پرتباک خیر مقدم کیا گیا۔ وفاقی وزیر عبدالعلیم خان نے آذر بائیجان کے سفیر کو بتایا کہ آذربائیجان پاکستان میں توانائی،صحت،انفارمیشن ٹیکنالوجی اور مواصلات کے شعبوں میں خاطرخواہ سرمایہ کاری کرسکتا ہے۔ وفاقی وزیر مواصلات عبد العلیم خان نے آذربائیجان کے سفیر خضر فرہادوف کو بتایا کہ پاکستان کی موجودہ حکومت وزیر اعظم محمد شہباز شریف کی قیادت میں پاکستان سمیت پورے خطہ کے ممالک سے غربت وافلاس، مہنگائی اور بے روزگاری کا خاتمہ کرنے اور عوامی مسائل کے حل کیلئے کوشاں ہے۔ امن واخوت کے جذبہ اور جہد مسلسل سے ہی مسائل پر قابو پایا جا سکتاہے، پاکستان میں صنعت و تجارت، سیاحت اور دیگر کئی شعبوں میں سرمایہ کاری کے وسیع مواقع موجود ہیں۔ ہم آذربائیجان کے تاجروں صنعتکاروں اور دیگر سرمایہ کاروں کو خوش آمدید کہیں گے، وفاقی وزیرمواصلات اورآذر بائیجان کے سفیر کا خوشگوار ماحول میں کئی امور پر تبادلہ خیال ہوا۔