اسلام آباد: پروفیسر ڈاکٹر ثمینہ ملک، ریکٹر بین الاقوامی اسلامی یونیورسٹی نے منگل کو یونیورسٹی کے خواتین کیمپس میں اسپرنگ گالا اور ثقافتی نمائش کا افتتاح کیا۔
گالا کی افتتاحی تقریب میں 30 سے زائد ممالک سے تعلق رکھنے والی طالبات نے شرکت کی۔ گالا میں 9 فیکلٹیز اور 50 کے قریب شعبہ جات کے درمیان درجنوں مقابلے شامل ہیں۔ کھیلوں اور ہم نصابی سرگرمیوں کے ان مقابلوں میں کرکٹ، ایتھلیٹکس، ٹگ آف وار، بیڈمنٹن، والی بال، فٹسال، باسکٹ بال، حفظ، نعت، کوئز، بیت بازی، مضمون نگاری، فوٹو گرافی اور سازی، پھولوں کی نمائش سمیت دیگر سرگرمیاں شامل ہیں۔
ریکٹر جامعہ نے اس موقع پر لگائے گئے سٹالز کا دورہ کیا جس میں مملکت سعودی عرب، انڈونیشیا، فلسطین، چین، مصر، افغانستان، ترکیہ، تھائی لینڈ اور پاکستانی ثقافتوں کے صوبائی سٹالز شامل تھے۔
اس موقع پر پروفیسر ڈاکٹر ثمینہ ملک نے کہا کہ طالبات کی کھیلوں اور ہم نصابی سرگرمیوں میں حصہ لینے کی حوصلہ افزائی ہماری اولین ترجیح ہے۔ انہوں نے مزید کہا کہ طالبات کو کھیلوں میں سبقت حاصل کرنے کے مزید مواقع فراہم کیے جائیں گے۔ انہوں نے خواتین کیمپس کی انتظامیہ کو کامیاب ایونٹ کے انعقاد پر مبارکباد دی اور کھیلوں، پینٹنگ، فوٹو گرافی اور خطاطی کے مقابلوں میں مقامی اور بین الاقوامی طالبات کی فعال شرکت کو بھی سراہا۔
اسپرنگ گالا کی افتتاحی تقریب میں انچارج (فیمیل کیمپس) ڈاکٹر سمیہ چغتائی، اسٹوڈنٹس ایڈوائزر ڈاکٹر سعدیہ سلیم چیمہ، پرووسٹ ڈاکٹر حمیرا اشفاق، مس نزہت زرین، ڈائریکٹر یو اے اینڈ ایف اے، انچارج سپورٹس نادیہ مختار نے بھی شرکت کی۔
ڈاکٹر سمیہ، انچارج، فیمیل کیمپس نے افتتاحی تقریب میں بتایا کہ اس گالا کا مقصد طالبات کو اپنے کاروبار قائم کرنے کے مواقع فراہم کرنا ہے جس سے انہیں یہ سیکھنے کا موقع ملے گا کہ کس طرح سماجی شعبے میں اپنا حصہ ڈالنا ہے۔ یونیورسٹی کے خواتین کیمپس میں سپورٹس گالا بدھ تک جاری رہے گا۔