اسلا م آباد(بیورو رپورٹ) ملی یکجہتی کونسل پاکستان کے زیر اہتمام 27مئی کو اسلام آباد میں آل پارٹیز کانفرنس منعقد ہو گی۔ آل پارٹیز کانفرنس بلانے کا ہدف سپریم کورٹ میں مبارک ثانی قادیانی نظر ثانی کیس، وفاقی شرعی عدالت کے سود خاتمے کے فیصلہ پر عمل در آمد، غزہ و فلسطین کی خوفناک صورت حال ، ملک کی معاشی و آئینی صورتحال اور افغانستان اور ایران کے ساتھ پاکستان کے تعلقات کی پائیداری کے حوالہ سے قومی رہنمائوں سے مشاورت اور لائحہ عمل کے لیے بلائی جا رہی ہے۔ان خیالات کا اظہار لیاقت بلوچ نے اے پی سی کے حوالہ سے انتظامی امور کے اجلاس میں کیا ، اجلاس میں شیعہ علماء کونسل کے نائب صدر علامہ عارف حسین واحدی ، مجلس وحدت مسلمین کے سیکرٹری جنرل سید ناصر عباس شیرازی ، ہدیہ الھادی کے صدر مفتی معرفت حسین شاہ ، جمعیت علماء پاکستان کے طاہر رشید تنولی، سید اسد عباس نقوی ، مولانا جعفر نقوی ، محمد نصر اللہ رندھاوا ،شاہد شمسی، سید مرتضی عباس اور اسرار احمد نعیمی نے شرکت کی ، اجلاس میں ایرانی صدر آیت اللہ ابراہیم رئیسی ، وزیر خارجہ امیر حسین اللہیان اور ان کے ساتھیوں کے لیے خصوصی دعا کی گئی۔