اسلام آباد(نیوز ڈیسک) اسپیکر قومی اسمبلی راجہ پرویز اشرف نے شہید محترمہ بینظیر بھٹو کے 16 ویں یومِ شہادت کے موقع پر ملک میں جمہوریت کی بحالی و مضبوطی کیلئے محترمہ بینظیر بھٹو شہید کی قربانیوں کو خراج تحسین پیش کرتے ہوے کہا کہ شہید محترمہ بے نظیر بھٹو پاکستان کا روشن چہرہ تھیں۔ انہوں نے ملک میں جمہوریت کی بحالی اور مضبوطی کی خاطر جان کا نذرانہ پیش کیا۔ شہید محترمہ بینظیر بھٹو کو عالم اسلام کی پہلی منتخب خاتون وزیراعظم کا اعزاز حاصل ہے۔ انہوں نے کہا کہ 27 دسمبر 2007 کو ملک کی تاریخ میں ہمیشہ سیاہ دن کے طور پر یاد رکھا گا۔
اسپیکر نے کہا کہ محترمہ بینظیر بھٹو شہید نے ہمیشہ دہشتگردی اور انتہا پسندی کے خلاف آواز بلند کی اور اس کی شدید الفاظ میں مذمت کی۔شہید محترمہ بینظیر بھٹو اس بات سے بخوبی آگاہ تھیں کہ دہشتگردی کے ناسور کے خاتمے کے بغیر ملک ترقی اور خوشحالی کی راہ پر گامزن نہیں کیا جا سکتا۔انہوں نے کہا کہ شہید محترمہ بینظیر بھٹو نے ملک کی ترقی و خوشحالی اور جمہوریت کی مضبوطی کی خاطر اپنی جان کی قربانی دی۔شہید محترمہ بینظیر بھٹو کی بے مثال قربانی کو تاریخ میں ہمیشہ یاد رکھا جائے گا۔
راجہ پرویز اشرف نے کہا کہ شہید محترمہ بینظیر بھٹو پاکستان میں جمہوری جدوجہد کی علمبردار تھیں، انہوں نے معاشرے کے پسماندہ طبقات کی خوشحالی، اقلیتوں کے حقوق کے تحفظ اور خواتین کی ترقی و خودمختاری کیلئے عملی جدوجہد کی۔ وہ شہری آزادیوں کی وکیل اور اتحاد کی داعی تھیں، شہید محترمہ بینظیر بھٹو وفاقی اکائیوں میں ہم آہنگی کی علامت تھیں۔
اسپیکر نے مزید کہا کہ محترمہ بینظیر بھٹو شہید کا مشن جمہوری نظام اور مساوات پر مبنی معاشرے کا قیام تھا۔ انہوں نے قائد عوام شہید ذوالفقار علی بھٹو کا مشن آگے بڑھانے میں اہم کردار ادا کیا۔انہوں نے کہا کہ شہید محترمہ بینظیر بھٹو زندگی کی آخری سانس تک صبر و تحمل اور جرات وبہادری کے ساتھ اپنے مشن پر کاربند رہی ۔ انہوں نے ہمیشہ اداروں کی مضبوطی، آئین کی بالادستی اور وفاق اور صوبوں میں ہم آہنگی کیلئے جدوحہد کی۔
راجہ پرویز اشرف نے کہا کہ شہید محترمہ بینظیر بھٹو نے نظریات کو مسلط کرنے کے بجائے تحمل و برداشت اور مکالمے کی سیاست کو فروغ دیا۔ ملک کو دہشتگردی کے ناسور سے پاک کرنے میں ان کی جدوجہد کلیدی اہمیت کی حامل ہے۔ اسپیکر نے کہا کہ شہید محترمہ بینظیر بھٹو کے مشن کو اپنا کر ہم ملک کو ترقی اور خوشحالی کی راہ پر گامزن کرسکتے ہیں۔ انہوں نے اس عزم کا اظہار کیا کہ شہید محترمہ بینظیر بھٹو کے مشن کو پایہ تکمیل تک پہنچایا جائے گا۔
