اسلام اباد (سپورٹس رپورٹر ) بہاول پورنے پشاور کو شکست دے کر ایس اے ایف ڈس ایبلٹی ٹی 20 کرکٹ چیمپئن شپ کے گریڈ ون فائنل کے لئے کوالیفائی کر لیا۔دوسرے میچ میں لاہور نے اسلام آباد کو شکست دی۔پاکستان فزیکل ڈس ایبلٹی کرکٹ ایسوسی ایشن کے زیر انتظام اورشاہد آفریدی فاؤنڈیشن، پاکستان کرکٹ بورڈ کے تعاون سے جاری چیمپئن شپ کے گریڈون کے میچز لاہور میں کھیلے جارہے ہیں،لیگ میچوں کے آخری روز پشاوراور اسلام آبادکو شکست ہو گئی۔ریس کورس پارک گراؤنڈ لاہور پر جمعرات کو پہلے میچ میں بہاولپور نے پشاور کو 22رنز سے شکست دی اور فائنل میں پہنچ گئی۔بہاولپور نے پہلے کھیلتے ہوئے چار وکٹوں پر140رنز اسکور کئے۔محمد نعمان نے 63گیندوں پر 10 چوکوں کی مدد سے 68اور محمد شہزاد نے چار چوکوں کی مدد سے 27رنز بنائے۔عابد حسین نے19اور وسیم مرزا نے 14رنزاسکور کئے۔نیاز علی شاہ نے دو اور گوہر خان نے ایک وکٹ حاصل کی،جواب میں پشاور کی ٹیم 17.2اوور118رنز بنا کر آؤٹ ہو گئی،عاطف خان پانچ چوکوں کی مدد سے31اور نہار عالم تین چوکوں کی مدد سے27رنز بناکر نمایاں اسکورر رہے۔واجد عالم14اور نیاز علی شاہ13رنز بناسکے۔بہاولپور کیجانب سےعبدالخالق نے تین ،عابد حسین اور محمد آصف نے دو دو جبکہ محمد نعمان نے ایک وکٹ حاصل کی۔محمد نعمان اس میچ کے پلیئر آف دی میچ قرار دئیے گئے انہیں ریجنل ہیڈ ملتان بہاولپور جمیل کامران نے ایوارڈ دیا۔دوسرے میچ میں لاہورنے اسلام آباد کو 124 رنزکےبھاری مارجن سےزیر کیالاہور نے پہلے کھیلتے ہوئے پانچ وکٹوں پر224رنز اسکور کئے۔ایم شہباز نے 48گیندوں پر 13چوکوں اور آٹھ چھکوں کی مدد سے121رنز کی برق رفتار اننگ کھیلی جبکہ شاہد علی وٹو نے 37رنز بنائے۔حمادشوکت نے دو جبکہ واقف شاہ،زبیر خان اور حمایتخان نےایک ایک وکٹ حاصل کی۔جواب میں اسلام آباد 14.2 اوورز میں 100رنز بناکر آؤٹ ہو گئی ۔عادل محمود 32،واقف شاہ 17اور عثمان پراچہ16 رنز کے ساتھ نمایاں رہے۔عبداللہ اعجاز نے تین، انیس اور زیشان علی نے دو دو جبکہ ارسلان،مقصود اور شاہد علی وٹو نے ایک ایک وکٹ حاصل کی۔سابق فرسٹ کلاس کرکٹرمحمود رشیدنے سنچری میکر ایم شہباز کو پلیئر آف دی میچ کا ایوارڈ دیا،اس موقع پر ریجنل ہیڈ اسلام آباد محمد طاہر اور محمد نظام بھی موجود تھے.