لاہور (سٹاف رپورٹر):پنجاب کی تاریخ میں پہلی مرتبہ ڈویژن، ڈسٹرکٹ اور تحصیل سطح پر قائم پریس کلبوں میں 9 کروڑ 45 لاکھ روپے کی خطیر گرانٹ تقسیم کر دی گئی۔ اس ضمن میں اتوار کو پریس کلبوں میں سپیشل گرانٹ کے چیک تقسیم کرنے کی تقریب منعقد ہوئی جس میں نگران وزیراعلیٰ پنجاب محسن نقوی، نگران وفاقی وزیر اطلاعات مرتضیٰ سولنگی اور صوبائی وزیر اطلاعات عامر میر سمیت پریس کلبوں کے عہدیداران اور صحافیوں کی بڑی تعداد نے شرکت کی۔
تقریب سے خطاب کرتے ہوئے وزیراعلیٰ پنجاب محسن نقوی نے کہا کہ پروفیشنل جرنلسٹس کی فلاح و بہبود حکومت کی ذمہ داری ہے، ایک صحافی کی حیثیت سے ہم پر بہت سے فرائض لاگو ہوتے ہیں۔ انہوں نے کہا کہ صحافی ذمہ داری کے ساتھ اپنے فرائض انجام دے رہے ہیں، ہماری خواہش ہے کہ صحافت کا معیار بلند ہو۔ وزیراعلیٰ پنجاب نے کہا کہ صحافیوں کو جدید دور کے تقاضوں کے مطابق تربیت کی فراہمی ناگزیر ہے۔
وزیراعلیٰ پنجاب نے پریس کلبوں کی آمدن کے ذرائع میں اضافے پر زور زور دیتے ہوئے کہا کہ وہ ایسے اقدامات اٹھائیں جن سے ان کے ریونیو میں بھی اضافہ ہو۔ اس موقع پر خطاب کرتے ہوئے وفاقی وزیر اطلاعات مرتضیٰ سولنگی نے کہا کہ پریس کلب آزادی صحافت کا اہم ستون ہیں، صحافی معاشرے کا اہم حصہ ہیں۔ انہوں نے کہا کہ وزیراعلیٰ پنجاب نے پریس کلبوں کیلئے 9 کروڑ 45 لاکھ روپے کی خطیر گرانٹ منظور کی جس پر حکومت پاکستان اور وزارت اطلاعات ان کی مشکور ہیں۔
انہوں نے کہا کہ وزیراعلیٰ پنجاب محسن نقوی نے ہمیشہ عوامی ضروریات کا خیال رکھا، عوامی خدمت میں وہ ہر وقت مصروف عمل رہتے ہیں۔ تقریب سے خطاب کرتے ہوئے صوبائی وزیر اطلاعات عامر میر نے کہا کہ وزیراعلیٰ پنجاب نے صحافی برادری کی فلاح و بہبود کا ہمیشہ خیال رکھا۔ انہوں نے کہا کہ پنجاب کی تاریخ میں پہلی مرتبہ ڈویژن، ڈسٹرکٹ اور تحصیل سطح پر قائم پریس کلبوں کو سپیشل گرانٹ دی گئی۔
عامر میر نے کہا کہ اس سپیشل گرانٹ سے پریس کلبوں کو جدید خطوط پر استوار کیا جا سکے گا، ہمارا مقصد صحافت کے مشن کو آگے بڑھانا ہے۔ قبل ازیں وزیراعلیٰ پنجاب محسن نقوی، وفاقی وزیر اطلاعات مرتضیٰ سولنگی اور صوبائی وزیر اطلاعات عامر میر نے پریس کلبوں میں سپیشل گرانٹ کے چیکس تقسیم کئے
