گوجرانوالہ(سٹاف رپورٹر)ممتاز سکالر مفتی ڈاکٹر علامہ محمد ابوبکر صدیق الازہری نے کہا ہے کہ رمضان المبارک کا مہینہ اللہ تبارک وتعالی کی ایک بڑی عظیم نعمت ہے-اس مہینے میں اللہ تعالی کی طرف سے انوار وبرکات کا سیلاب آتا ہے-۔اس ماہ کی عظمت کا اندازہ اس بات سے لگایا جا سکتا ہے کہ قرآن پاک کا نزول اسی پاک مہینے میں ہوا،رمضان کا پہلا عشرہ رحمت، دوسرا عشرہ مغفرت اور تیسرہ عشرہ جہنم کی آگ سے نجات کا ہے۔ان خیالات کا اظہار انہوں مرکزی جامع مسجد انوارالمساجد پاپولر نرسری میں درس قرآن پاک بسلسلہ استقبال رمضان المبارک ،عشرہ رحمت کے حوالے سے محفل پاک کی تقریب سے خطاب کرتے ہوئے کیا ۔اس موقع پر جماعت اہلسنت پاکستان کے ضلعی ناظم اعلیٰ مولانا حافظ محمد رفیق قادری،ضلعی امیر حاجی محمد یعقوب چشتی،صاحبزادہ حافظ محمد ابوبکر رفیق ،حافظ محمد عمران یعقوب سیالوی،ملک ظفر حسین نے بھی خطاب کیا ۔تقریب میں ڈاکٹر محمد اظہار الحق ، حاجی محمد اشرف بٹ قادری، قاری محمد شمشیر علی ، چوہدری عبدالرحمن گورائیہ، محمد ثمر ریحان قادری ، سر محمد حفیظ کے علاوہ کثیر تعداد میں احباب محبت نے شرکت کی ۔ مفتی ڈاکٹر علامہ محمد ابوبکر صدیق الازہری نے مزید کہا کہ رمضان سے قرآن کریم کا بہت گہرا تعلق ہے-قرآن کریم اسی ماہ رمضان کی ایک خاص رات میں نازل ہوا۔ اس مبارک رات کو، ہم لیل القدریا شب قدر کہتے ہیں۔ انہوں نے کہاکہ ہمیں رمضان کے اوقات وساعات کی قدر کرتے ہوئے روزہ رکھنے کے ساتھ ساتھ تلاوت قرآن کریم بھی میں مصروف رہنا چاہیے۔ رمضان اور قرآن ایک دوسرے سے اس طرح مربوط ہیں کہ یہ دونوں قیامت کے دن روزہ رکھنے والوں اور تلاوت کرنے والوں کے حق میں سفارش بھی کریں گے۔مولانا حافظ محمد رفیق قادری نے کہاکہ رمضان المبارک کے مہینہ میں اپنا وقت قرآن کریم میں تدبر وتفکر اور اس کی تلاوت وقرات میں گزاریں۔ یہ عمل جہاں ان کو رمضان جیسے مبارک مہینہ میں ادھر ادھر کی لغو اور لایعنی باتوں سے محفوظ رکھے گاوہیں اس عمل سے اس کی آخرت بھی سدھرے گی اور من جانب اللہ بڑااجر و ثواب بھی ملے گا۔تقریب کے آخر میں وطن عزیز کی ترقی خوشحالی ،ملک میں امن و امان کے قیام،ملکی سلامتی، افواج پاکستان کی سربلندی اور مدارس و مساجد کی حفاظت کے لئے خصوصی دعا کی گئی۔