پاکستان شوبز انڈسٹری کے سینئر اداکار طلعت حسین کی بیٹی، اداکارہ تزین حسین نے مداحوں کو والد کی صحت کی موجودہ صورتحال کے بارے میں آگاہ کیا ہے۔
تزین حسین نے حال ہی میں ایک نجی ٹی وی کے پروگرام میں بطور مہمان شرکت کی جہاں اُنہوں نے اپنے والد، اداکار طلعت حسین کے بارے میں بھی بات کی۔
اُنہوں نے بتایا کہ والد ہمیشہ سے ہی بہت نرم مزاج انسان ہیں، اس لیے جب بھی مجھے اور میرے بہن بھائیوں کو والدہ کی ڈانٹ سے ڈر لگتا تھا تو ہم اپنے والد کے پاس جاتے تھے۔
اداکارہ نے بتایا کہ والد بہت مہذب انسان ہیں اور اُنہوں نے ہم بچوں میں اپنی یہ تمام خصوصیات منتقل کی ہیں۔
اُنہوں نے والد کی صحت کے بارے میں بات کرتے ہوئے کہا کہ وہ ڈیمنشیا کا شکار ہیں اور کچھ عرصے پہلے انہیں سینے میں انفیکشن ہو گیا تھا جس کی وجہ سے ان کی طبیعت کافی خراب ہوگئی تھی اور انہیں اسپتال میں داخل کروایا گیا۔
تزین حسین نے بتایا کہ اس وقت ہم نے سب لوگوں سے ان کے لیے دعاؤں کی اپیل کی اور مداحوں کی دعاؤں سے وہ خود چل کر اسپتال سے گھر واپس آئے اور اب وہ ٹھیک ہیں مگر کبھی کبھی ان کی طبیعت تھوڑی ناساز رہتی ہے۔
اُنہوں نے بتایا کہ ڈیمنشیا کی وجہ سے والد کی یادداشت متاثر ہو رہی ہے اور کبھی کبھی اُنہیں لوگوں کو پہچاننے میں مشکل ہوتی ہے۔
