اسلام آباد (سٹاف رپورٹر)پاکستان میں تعینات لیبیا کے سفیر معمر عبدالمطلب نے کہا ہے کہ پاکستان اور لیبیا میں تجارت تعلقات میں بہتری کے وسیع مواقع موجود ہیں،دونوں ممالک بھائی چارے، مضبوط تعلقات، مشترکہ اہداف اور متنوع اور مستحکم تزویراتی شراکت داری کے امید افزا مستقبل سے بندھن میں بندھے ہوئے ہیں۔گزشتہ دہائیوں میں لیبا کی ترقی اور تعمیر میں پاکستان کی افزادی قوت نے نمایاں ترین کردار ادا کیا ہے۔ دونوں برادر ممالک کے درمیان تجارتی تعلقات میں حائل مشکلات کے خاتمے اور تعاون کے مواقع سے فائدہ اٹھانے کیلئے مشترکہ اقدامات کی ضرورت ہے۔ان خیالات کا اظہار انہوں نے گزشتہ روز صدر اسلام آباد چیمبر آف کامرس اینڈ انڈسٹری سے گفتگو کرتے ہوئے کیا جنہوں نے وفد کے ہمراہ ان سے لیبا کے سفارتخانے میں ملاقات کی۔ اس موقع پر لیبیا اور پاکستان کے درمیان دوطرفہ تعلقات کو مضبوط بنانے پر تبادلہ خیال کیا گیا۔لیبا کے سفیر نے کہا کہ پاکستان کے موجود پاس زراعت ،میڈیکل اور باصلاحیت افرادی قوت لیبا کا حقیقی کاروباری شراکت دار بننے کیلئے اہم ہے۔دونوں ممالک نے ماضی میں بھی اور اب بھی ہر سطح پر ایک دوسرے کا بھرپور ساتھ دیا ہے۔انہوں نے کہا کہ یہ بات خوش آئند ہے کہ اسلام آباد چیمبر اور دیگر کاروباری برادری لیبا کے ساتھ تجارتی تعلقات کو فروغ دینا چاہتی ہے۔اس سلسلے میں دونوں ممالک کو تعاون کے واضح اہداف طے کرنے کی ضرورت ہے۔اس موقع پر گفتگو کرتے ہوئے صدر اسلام آباد چیمبر آف کامرس اینڈ انڈسٹری احسن ظفر بختاوری نے کہا کہ پاکستان اور لیبیا کے درمیان تعلقات ہمیشہ دوستانہ رہے ہیں کیونکہ دونوں ممالک ایک جیسے مذہبی شناخت، ثقافتی روابط بالخصوص اسلامی ورثہ رکھتے ہیں۔احسن ظفر بختاوری نے کہا کہ لیبیا میں پاکستانی افرادی قوت کے لیے بے شمار مواقع موجود ہیں، انہوں نے مزید کہا کہ دوطرفہ تعلقات کی مضبوطی اور کاروبار کے فروغ کے لیے لیبیا کے ساتھ براہ راست فضائی روابط کی بحالی کی اشد ضرورت ہے، آئی سی سی آئی کے صدر نے مزید کہا کہ اسلام آباد چیمبر اپنی طرف سے کاروباری برادری اور عوام کے فائدے کے لیے دونوں ممالک کے درمیان سرمایہ کاری کے مواقع تلاش کرنے میں اپنا کردار ادا کرنے کے لیے پرجوش ہے۔اس موقع پر سیکرٹری جنرل یو بی جی ظفر بختاوری، آئی سی سی آئی کے سینئر نائب صدر فواد وحید اور آئی سی سی آئی کے سابق صدر اعجاز عباسی بھی ملاقات میں شریک ہوئے۔