اسلام آباد (سٹاف رپورٹر)صدر اسلام آباد اسٹیٹ ایجنٹس ایسو سی ایشن سردار طاہر محمود اور جنرل سیکرٹری چوہدری زاہد رفیق نے کہا ہے کہ پراپرٹی ٹیکس میں چار سو فیصد تک اضافہ قابل مذمت ہے ہم اسے مسترد کرتے ہیں ہمارا متفقہ فیصلہ ہے کہ ہم پراپرٹی ٹیکس ادا نہیں کریں گے اور عید کے بعد احتجاجی تحریک بھی چلائیں گے. مقامی حکومت کی غیر موجودگی میں میٹروپولیٹن کارپوریشن کے پاس کوئی اخلاقی بنیاد یا اختیار نہیں ہے کہ وہ نئے ٹیکسوں کو بڑھانے یا نافذ کر ے اور اس حوالے سے طویل المدتی پالیسی فیصلے کرے. سردار طاہر اور زاہد رفیق نے کہا کہ پراپرٹی ٹیکس کیخلاف معاملہ عدالت میں موجود ہے ایسے موقع پر اس میں اضافہ کرنا توہین عدالت کے زمرے میں بھی آتا ہےاس لیے ماضی میں پراپرٹی ٹیکس میں اضافے کے خلاف اپیلوں کے فیصلے تک ایم سی آئی کے پاس نیا ٹیکس لگانے کا جواز نہیں ہے. ہمارا مطالبہ ہے کہ وزیراعظم ،وزیر داخلہ فوری طور پر نوٹس لے کر اس ظالمانہ ٹیکس کے نفاذ کا فیصلہ واپس کروائیں.