اسلام آباد(سٹاف رپورٹر)ممبر قومی اسمبلی انجم عقیل خان نے ایرانی صدر سید ابراہیم رئیسی کو پاکستان میں تین روزہ دورہ پر خوش آمدید کہا اور دونوں برادر اسلامی ممالک کے درمیان بہتر تعلقات کی امید ظاہر کی ۔ انجم عقیل نے کہا کہ پاکستان اور ایران کے درمیان گیس پائپ لائن ، بارڈر ٹریڈ ، ایران پاکستان بارڈر پر انڈسٹریل زون کے قیام ، انرجی سمیت اہم امور پر پیش رفت ہو گی ۔مسلمانوں کی تمام مشکلات اور مسائل کا حل آپس میں اتحاد ہے ۔ایران نے گزشتہ دنوں اسرائیل پر ایک نپا تُلا حملہ کیا اور پوری دنیا کو بتا دیا کہ ہم کسی دباؤ میں نہیں آئیں گے ۔انہوں نے کہا کہ ایران کے حملہ کے بعد ایک چیز واضح ہو گئی کہ جدید ترین ڈیفنس سسٹم کا حامل خطہ میں ناقابل تسخیر کا دعویدار ملک حملہ روکنے میں ناکام رہا ۔ایران نے شام کے سفارت خانے میں ہونے والے حملہ کے ردعمل میں حملہ کیا جو کہ جائز تھا ۔اقوام متحدہ مشرق وسطی میں امن کے قیام کے لیے اپنا کردار ادا کرئے جس میں وہ آج تک ناکام رہا ہے ۔