گوجرانوالہ (سٹاف رپورٹر) تعلیم کے بغیر کوئی قوم ترقی کی منازل طے نہیں کرسکتی اور معیاری درسگاہ ہی مستقبل کے معماروں کی اچھی تعلیم و تربیت کی ضامن ہوتی ہے کسی بھی معاشرے میں مدرس ،معلم،استاد کی حیثیت ایک معمار قوم کی سی ہوتی ہے جس قوم کو بچپن سے اچھے استاد میسر آجائیں وہ قوم اچھی بن جاتی ہے اچھے اساتذہ قوم کی نسلیں سنوار دیتے ہیں اساتذہ کرام کی بہترین خدمات سے وطن کی ترقی کی رفتار تیز تر ہوجاتی ہے ۔ تعلیم کے بغیر ترقی ممکن نہیں،تعلیم یافتہ قومیں ہی دنیا میں نام پیدا کرتی ہیں۔ ملک وقوم کی ترقی میں تعلیم اہم کردار ادا کرتی ہے ۔ ان خیالات کا اظہارشیخ الطاف ڈی ای او ایجوکیشن،مظفر جاوید بھٹی ڈپٹی ڈائریکٹر لوکل گورنمنٹ،چوہدری افضل علی ساہی سابق اسسٹنٹ ڈائریکٹر ایجوکیشن گوجرانوالہ ،ارشد بٹ ڈپٹی ڈائریکٹر کالجز سیالکوٹ اور نوجوان ماہر تعلیم ڈائریکٹر لیڈز اسکول سسٹم مقبول الہی کیمپس محمد عمر مغل نے لیڈز اسکول سسٹم مقبول الہی کیمپس جی مگنولیا پارک کی سالانہ تقریب تقسیم انعامات کے موقع پر خطاب کرتے ہوئے کیا۔انہوں نے والدین پر زور دیا ہے کہ وہ اپنے بچوں کو زیادہ سے زیادہ تعلیم دے کر قومی فریضہ ادا کریں کیونکہ تعلیم کے بغیر کوئی قوم ترقی نہیں کرسکتی ۔ بچوں کی کردارسازی اور شخصیت میں والدین اور اساتذہ کو کلیدی حیثیت حاصل ہے اساتذہ ملک و ملت کے مستقبل کے پاسبان ہیں ۔ علم بہت بڑی نعمت ہے ڈائریکٹر لیڈز اسکول سسٹم مقبول الہی کیمپس محمد عمر مغل نے کہا کہ ہمارا ادارہ علم کے حصول کیلئے اہم کردار ادا کر رہا ہے، بچوں کو جدید سائنسی تعلیم کے ساتھ ساتھ دین اسلام کی تعلیمات سے روشناس کروانا ہمار ا فرض اولین ہونا چاہیئے۔ ہم آنے والی نسلوں کیلئے ایک محفوظ اور خوشحال پاکستان کیلئے جدوجہد کر رہے ہیںاور بچوں اور بچیوں کو زیور تعلیم سے آراستہ کر رہے ہیں ۔ اس موقع پر طلبا وطالبات نے سبق آمیز موضوعات پر ٹیبلو پیش کر کے حاضرین سے خوب داد وصول کی۔ تقریب میں تمام پوزیشن ہولڈرز طلبا وطالبات او ر اعلیٰ کارکردگی کا مظاہرہ کرنے والے اساتذہ کرام کو شیلڈز اور کیش پرائز سے بھی نوازا گیا۔ آخر میں نمایاں پوزیشن حاصل کرنے والے طلبا و طالبات میں انعامات تقسیم کیے گئے۔