گوجرانوالہ(نیوز ڈیسک)فرزند امام مسجد اقصی اور رکن فلسطینی پارلیمنٹ الشیخ میمون اسعد تمیمی نے کہا ہے کہ مرتے دم تک اسرائیل کا مقابلہ کریں گے ۔ مسلہ فلسطین ہمارا نہیں پوری امت مسلمہ کا مسلہ ہے ، ہم انشاء اللہ اپنی ہر چیز مسجد اقصیٰ کی حفاظت کے لئے قربان کردیں گے ۔ اسرائیلی بربریت کی بدولت فلسطین اور غزہ لہو لہو ہے۔ اقوام متحدہ میں مسئلہ فلسطین کی قراردادوں پر عمل درآمد نہ ہونا لمحہ فکریہ ہے۔ ملت اسلامیہ کے حکمرانوں کو فلسطین کی آزادی کیلئے صدائے احتجاج بلند کرنا چاہئے۔ ان خیالات کا اظہار جمعیت اہلحدیث پاکستان کے زیر اہتمام منعقدہ تقریب سے خطاب کرتے ہوئے کیا۔اس موقع پر جمعیت اہلحدیث پاکستان کے صدر علامہ ہشام الہی ظہیر، علامہ طارق محمود یزدانی، قاضی عبدالقدیر خاموش، میاں محمد سلیم شاہد ،علامہ محمد عارف اثری نے بھی خطاب کیا۔ تقریب میں، مولانا قاری ناصر محمود سلفی ،حافظ عطاالرحمن ثاقب،مولانا حجاج اللہ صمدانی،مولانا قاری عبدالرحیم ساجد سمیت کثیر تعداد میںجمعیت اھل حدیث پاکستان کے عہدیداروں و اراکین نے شرکت کی۔ امام مسجد اقصی الشیخ میمون اسعد تمیمی نے مزید کہا کہ فلسطین کے دل پاکستانیوں کیساتھ دھڑکتے ہیں۔ ملت اسلامیہ پر مشکل وقت ضرور ہے لیکن اس کا یہ مطلب نہیں ہم اپنے پر ہونیوالے مظالم کے خلاف خاموشی اختیار کئے بیٹھیں۔انہوں نے مزید کہا کہ اگر اسرائیل یہ سمجھتا ہے کہ وہ فلسطینوں کے جذبات حریت کو شکست دے کر مسجد اقصیٰ کو شہید کرکے ہیکل سلیمانی تعمیر کرلے گا تو یہ اس کی خام خیالی ہے ہمارابچہ بچہ مسجد اقصیٰ کی حرمت کے لئے کٹ مرے گا ۔ہمارا مال ہماری جان ہماری اولاد القدس کے تقدس کے لئے قربان،ہم مرتے دم تک اسرائیل کا مقابلہ کریں گے ۔امت مسلمہ کا فرض ہے کہ وہ اپنے نہتے فلسطینی مسلمانوں کی مدد کریں اور ان کو اپنی خصوصی دعائوں میں یاد رکھیں ۔ہم انشاء اللہ مسجد اقصیٰ کی حفاظت کا فریضہ نبھاتے رہیں گے ۔۔قبل ازیں جب امام مسجد اقصی الشیخ میمون اسعد تمیمی، جمعیت اہلحدیث پاکستان کے صدر علامہ ہشام الہی ظہیر، علامہ طارق محمود یزدانی، قاضی عبدالقدیر خاموش چیئرمین علماء پاکستان ،حافظ خالد ظہیر پروٹو کول آفیسر اور ان کے رفقاء جب تقریب میں پہنچے توماہر تعلیم میاں محمد سلیم شاھد، علامہ محمد عارف اثری و دیگر نے معزز مہمانوں کا پھولوں کی پتیاں نچھاور کرکے ان کا شاندار استقبال کیا۔