اسلام آباد ( سٹاف رپورٹر) این اے 47 سے آزاد امیدوار مصطفیٰ نواز کھوکھر کی منظم انتخابی مہم چلانے کے لئے سب سیکٹرز وائز چودہ رکنی رابطہ کمیٹیوں کا اعلان کر دیا گیا۔اس ضمن میں جی۔سیون فور میں عامر عباسی کی زیر صدارت تنظیمی تقریب سے خطاب کرتے ہوئے مصطفیٰ نواز کھوکھر نے کہا کہ عوامی حقوق کا تحفظ میری اوالین ترجیع ہے۔انتشار کی نہیں اقدار اور باہمی عزت و وقار کی سیاست بحال کرنے کے لئے عوام کے پاس جارہا ہوں ۔نو منتخب اراکین رابطہ کمیٹی سے ہمیشہ رابطے بحال رہیں گے۔ جس گھر میں ٹی وی ہے اس گھر میں اپنی قومی سوچ اور نظریہ کے ساتھ موجود ہوں۔ حقائق اور دلائل کے ساتھ اپنا نقطہ نظر بیان کرتا ہوں۔ قبل ازیں سیاسی رہنماء جاوید انتظار نے نو منتخب اراکین رابطہ کمیٹی برائے جی۔ سیون تھری ون اور جی۔ سیون تھری فور کو گائیڈ لائن دیتے ہوئے کہا کہ رابطہ کمیٹی کا ہر رکن روزانہ دس لوگوں تک انتخابی منشور کے ساتھ ملے۔ہر رکن اسے مصطفیٰ نواز کھوکھر کا نہیں اپنا انتخاب سمجھ کر کام کرے۔ اب جیت اور ہار ہم سب کی جیت اور ہار ہوگی۔ این اے 47 میں سرکاری نوکری کے علاوہ انفارمیشن ٹیکنالوجی( ڈیجیٹل سکلز ) پروگرام سے نوجوانوں اور خواتین کے لئے روزگار اور کاروبار کے مواقع پیدا کئے جاسکتے ہیں ۔عامر عباسی،چودھری شاہد گجر اور ذوالفقار علی جعفری المعروف گونی و دیگر نے خطاب کرتے ہوئے کہا کہ اراکین رابطہ کمیٹی میں پیپلز پارٹی،ن لیگ ، تحریک انصاف سمیت دیکر تجربہ کار سماجی کارکنان کو ذمہ داری دی ہے ۔عامر عباسی نے کہا کہ جلد دیگر سب سیکٹرز میں رابطہ کمیٹیاں بنائیں گے۔کمیٹیوں میں مسیحی برادری کو بھی برابری کی بنیاد پر نمائندگی دے رہے ہیں۔لوگ جوق در جوق مصطفیٰ نواز کھوکھر کے حق میں آمادگی ظاہر کر رہے ہیں۔