اسلام آباد (سٹاف رپورٹر)چیف کمشنر اسلام آباد و چیئرمین سی ڈی اے کیپٹن (ر) انوار الحق کی ہدایت پر اسلام آباد کے قدرتی مناظر کو ماحولیاتی آلودگی اور اسموگ سے بچانے کے لئے ٹھوس اور مؤثر اقدامات اٹھائے جارہے ہیں۔ اس ضمن میں انفورسمنٹ ونگ نے منگل کے روز اسلام آباد کے سیکٹر I-13 شمس کالونی میں پلاسٹک سے چلنے والے کارخانے جس کا دھواں پورا علاقے میں ماحولیاتی آلودگی کا سبب بن رہا تھا کے مالکان کا چالان کرکے سینئر سپیشل مجسٹریٹ سی ڈی اے کی عدالت میں پیش کیا۔ سینئر سپیشل مجسٹریٹ نے کارخانوں کو فوری سیل کرنے کا حکم دیتے ہوئے ملزمان کو قید و جرمانہ کی سزا سنائی اور حوالات میں بند کروا دیا۔تفصیلات کے مطابق چیف کمشنر اسلام آباد و چیئرمین سی ڈی اے نے کچھ روز قبل انفورسمنٹ، انوائرمنٹ اور سینی ٹیشن ونگ کو سختی سے ہدایات جاری کیں تھیں کے اسلام آباد کے قدرتی مناظر کو ماحولیاتی آلودگی اور اسموگ سے پاک رکھنے کے لئے ذمہ داران کیخلاف فوری طور پر بلا تفریق اور بلا تعطل آپریشن کیا جائے بصورت دیگر متعلقہ اہلکاروں کیخلاف محکمانہ کارروائی عمل میں لائی جائے گی.مزید برآں گرین ایریاز میں ریت بجری کے ٹھیے لگانے والے دو ملزمان کو بھی پولیس حراست میں لینے کے احکامات جاری کرتے ہوئے انہیں قید و جرمانہ کی سزائیں سنانے ہوئے بند حوالات کروا دیا گیا.اس موقع پر سی ڈی اے انتظامیہ کا کہنا تھا کہ کسی کو بھی اسلام آباد کے قدرتی مناظر اور حسن کو تباہ و برباد کرنے کی ہرگز اجازت نہیں دی جائے گی اور نہ ہی اسلام آباد کےشہریوں کی زندگیوں سے کھیلواڑ کا موقع دیا جائے گا اور جو کوئی ایسا کرے گا اس کا مقدر جیل ہے خواہ وہ کتنا ہی با اثر کیوں نہ ہو۔