ملتان/ اسلام آباد/کراچی (عامر رفیق بٹ)سابق صدر پاکستان اور پاکستان پیپلزپارٹی پارلیمینٹیرینز کے صدر آصف علی زرداری نے قائد عوام شہید ذوالفقار علی بھٹو کی 96ویں یوم پیدائش کے موقع پر ملتان میں ایک تقریب سے خطاب کرتے ہوئے پاکستان پیپلزپارٹی کے بانی کو زبردست انداز میں خراج عقیدت پیش کیا۔ صدر زرداری نے کہا کہ انہیں جنوبی پنجاب کی صورتحال کا علم تھا اسی لئے انہوں نے یوسف رضا گیلانی کو وزیراعظم پاکستان بنایا۔ انہوں نے کہا کہ پاکستان پیپلزپارٹی نے ہمیشہ عوام کی خدمت کی ہے۔ ہم نے بینظیر انکم سپورٹ پروگرا متعارف کروایا تاکہ پاکستان کی غریب خواتین کی مدد ہو سکے۔ انہوں نے کہا کہ 2008-13 ءکی حکومت کے دوران انہوں نے گندم اور کپاس کی سپورٹ پرائس میں اضافہ کیا تاکہ غریب ہاری بھی اس سے فائدہ اٹھا سکیں۔ آصف علی زرداری نے کہا کہ ان کی حکومت کے دوران صرف کپاس کی ایکسپورٹ 25بلین ڈار سے زیادہ ہوگئی تھی اور پاکستان کی کل ایکسپورٹ 40 بلین ڈالر ہوگئی تھی۔ بدقسمتی سے ہماری حکومت کے بعد ترقی کی یہ رفتار جاری نہیں رہی۔ انہوں نے کہا کہ پاکستان کے عوام انتہائی مضبوط ہیں اور یہی بات ملک کا حقیقی استحکام ہے۔ ہم عوام کو ہم تربیت دیں گے اور یہی چیز ہمیں فائدہ پہنچائے گی۔ یہ ہماری زمین ہے اور ہم اسے خوشحال بنائیں گے۔ صدر زرداری نے کہا کہ انہوں نے شہید ذوالفقار علی بھٹو کا ریفرنس سپریم کورٹ میں بھیجا جس کی سماعت اب ہو رہی ہے۔ انہوں نے وعدہ کیا کہ انشااللہ ہم اس میں کامیاب ہوں گے اور شہید ذوالفقار علی بھٹو معصوم ثابت ہوں گے۔ صدر زرداری نے کہا کہ انہیں شہید ذوالفقار علی بھٹو کی ہر بات یاد ہے۔ وہ جیل میں اسی سیل میں رہے جہاں شہید ذوالفقار علی بھٹو بھی رہے تھے۔ جیل کے عملے نے انہیں شہید بھٹو کی ساری باتیں بتائی ہیں اور انہیں شہید بھٹو کی تمام تاریخ یاد ہے۔ انہوں نے کہا کہ انہیں ہر چیز کا ادراک شہید ذوالفقار علی بھٹو سے ہوا یہی وجہ ہے کہ جو باتیں وہ سمجھتے ہیں کوئی دوسرا نہیں سمجھتا۔ آصف علی زرداری نے کہا کہ وہ ملتان، جنوبی پنجاب اور تمام صوبوں کو خوشحال بنائیں گے۔ انہوں نے وعدہ کیا کہ وہ عوام اور شہید ذوالفقار علی بھٹو کی خدمت اپنی آخری سانسوں تک جاری رکھیں گے۔