اسلام آباد( وسیم بٹ)قراقرم انٹرنیشنل یونیورسٹی اور کمیٹی برائے سائنسی اور تکنیکی تعاون (COMSTECH) نے مشترکہ طور پر علمی اور تحقیقی تعاون کو فروغ دینے پر اتفاق کیا۔شعبہ تعلقات عامہ کے آئی یو کی جانب سے جاری کردہ بیان کے مطابق اس بات پر اتفاق جامعہ قراقرم کے وائس چانسلر ڈاکٹر پروفیسر عطا اللہ شاہ کی قیادت میں KIU کے وفد کی COMSTECH کے کوآرڈینیٹر جنرل پروفیسر ڈاکٹر محمد اقبال چوہدری کے ساتھ ہونے والی ملاقات میں کیاگیا۔ ملاقات میں دونوں اداروں کے درمیان قراقرم انٹرنیشنل یونیورسٹی میں تعلیمی معیار کو مزید بڑھانے کے لیے COMSTECH کی جانب سے تعاون، فیکلٹی ڈویلپمنٹ پروگرام، سٹوڈنٹس ایکسچینج پروگرام اور ممکنہ تعاون کے مواقع تلاش کرناسے متعلق امور پر سیر حاصل گفتگو کی گئی ۔بات چیت کے دوران کے آئی یو کے وائس چانسلر نے جامعہ قراقرم اور COMSTECH کے زمہ داران کے درمیان تعلقات کو مضبوط بنانے کے عزم کا اظہارکرتے ہوئے کہاکہ KIU میں تعلیم، تحقیق اور مجموعی تعلیمی ترقی کے معیار کو بڑھانے میں OIC ریاستی ممالک کی یونیورسٹیوں کے ساتھ تعاون کی اہمیت پر زور دیا۔ ملاقات کے دوران اظہار خیال کرتے ہوئے پروفیسر ڈاکٹر محمد اقبال چوہدری COMSTECH کے کوآرڈینیٹر جنرل نے خطے میں KIU کے تعلیم و تحقیق کے حوالے سے اقدامات اور کردار کو سراہا اور فیکلٹی ڈویلپمنٹ، طلباء کے تبادلے کے پروگراموں اور دیگر باہمی تعاون کے لیے KIU کے اقدامات کی حمایت کا اظہار کیا۔ انہوں نے KIU کو پاکستان کے دور دراز علاقے میں اعلیٰ تعلیم و تحقیق کے فروغ کے لیے ہر قسم کے تعاون کی یقین دہانی کرائی۔ملاقات میں دونوں اداروں کے سربراہان نے مشترکہ تحقیقی منصوبوں، ورکشاپس، سیمینارز اور تعلیمی وسائل کے تبادلے سمیت تعاون کے ممکنہ شعبوں پر تبادلہ خیال بھی کیااور مشترکہ تعاون سے KIU میں طلباء اور فیکلٹی کو سیکھنے کے بہتر ین مواقع اور مختلف سائنسی اور تکنیکی شعبوں میں جدید تحقیق کو ترقی دینے کا اعادہ کیا۔کے آئی یو کے وائس چانسلر نے کمیٹی برائے سائنسی و تکنیکی تعاون کے کوارڈنیٹر کوپاک چائنہ دوستی پر لکھی گئی کتاب دیتے ہوئے موسمیاتی تبدیلی اور اس کے موافقت اور دیگر شعبوں پر KIU کی جاری کوششوں پر روشنی ڈالی۔ملاقات میںکمیٹی برائے سائنسی و تکنیکی تعاون کے کوارڈنیٹر نے گزشتہ پانچ سالوں میں گلگت بلتستان میں تعلیمی ترقی کے لیے کے آئی یو کے وائس چانسلر کی سائنسی شراکت اور ٹھوس کوششوں کو سراہا۔