گوجرانوالہ ( حافظ عبدالجبار سے) کمشنر گوجرانوالہ ڈویژن سید نوید حید ر شیرازی کا ڈپٹی کمشنر گوجرانوالہ فیاض احمد موہل اور دیگرمتعلقہ افسران کے ہمراہ بزنس فسیلٹیشن سنٹر(کاروبار سہولت مرکز)‘ ڈی ایچ کیو ہسپتال‘مجوزہ ای رجسٹریشن سنٹر شاہین آباد اور سیف سٹیز اتھارٹی کے قیام کے سلسلہ میں جاری ترقیاتی کاموں کا تفصیلی جائزہ۔ کمشنر نے اس عزم کا اظہار کیا کہ وزیر اعلی پنجاب کے وژن اور ہدایات کے تحت پورے گوجرانوالہ ڈویژن بالخصوص گوجرانوالہ میں عوام دوست فلاحی ترقیاتی کاموں کو جلد از جلد پایہ تکمیل تک پہنچایا جا رہاہے تاکہ عا م آدمی تک ان منصوبوں کے حقیقی ثمرات پہنچائے جا سکیں اور گڈ گورننس کے ذریعے حکومتی اداروں کی کارکردگی میں نمایاں بہتری کے ساتھ عوامی اعتماد کو بحال کیا جا سکے۔
کمشنر نے کہاکہ کاروباری سرگرمیوں اور سرمایہ کاری کے فروغ اورکاروباری اداروں کی سہولت کے لئے کمشنر آفس میں جدید اسٹیٹ آف دی آرٹ بزنس فسیلٹیشن سنٹر بہت جلد کام شروع کر رہاہے اور متوقع طورپر وزیر اعلی پنجاب سید محسن نقوی اس کاافتتاح بھی کریں گے۔ انہوں نے بتایاکہ پہلے مرحلہ میں 22 کروڑ کی لاگت سے ڈی ایچ کیو ٹیچنگ ہسپتال میں عدم دستیاب سہولیات کی فراہمی کے بعد اب 38 کروڑ کی لاگت سے ہسپتال کے مختلف شعبوں کی مکمل ری ویمپنگ کے سلسلہ میں بھی ترقیاتی کام زور وشور سے جاری ہیں اور گوجرانوالہ کے شہریوں اور مریضوں کو اب بہترین طبی سہولیات اورانفراسٹرکچر کی فراہمی کا وعدہ بھی پورا ہو جائے گا۔ انہوں نے 3 کروڑ کی لاگت سے سیف سٹیز اتھارٹی پراجیکٹ کے تحت کمانڈ اینڈ کنٹرول سنٹر بلڈنگ کے ترقیاتی کاموں کا جائزہ لیتے ہوئے کوالٹی کو برقرار ر کھنے اور مقررہ مدت کے اندر اس کی تکمیل کی بھی ہدایت کی۔ کمشنر نے ڈپٹی کمشنر اوردیگر افسران کے ہمراہ شاہین آباد میں مجوزہ ای رجسٹریشن سنٹر کے سلسلہ میں سائٹ کا بھی معائنہ کیا۔بعد ازاں کمشنر نے ڈپٹی کمشنر فیاض احمد موہل اور دیگر افسران کے ہمراہ گوجرانوالہ ایکسپریس ویموٹروے لنک کا بھی دورہ کیا اور جاری ترقیاتی سرگرمیوں کا جائزہ لیا – انہوں نے توقع ظاہر کی کہ یہ اہم منصوبہ رواں ماہ میں مکمل ہو جائے گا جس کے بعد گوجرانوالہ سے لاہور بذریعہ موٹر وے سفر کی سہولت حاصل ہو جائے گی –