اسلام آباد (سٹاف رپورٹر ) اسلام آباد چیمبر آف کامرس اینڈ انڈسٹری کے صدر احسن ظفر بختاوری نے ایک وفد کے ہمراہ بحریہ یونیورسٹی اسلام آباد کا دورہ کیا اور یونیورسٹی کے ریکٹروائس ایڈمرل (ریٹائر) آصف خلیق کے ساتھ ملاقات میں یونیورسٹی اور انڈسٹری روابط کو مضبوط کرنے کے امور پر بات چیت کی تا کہ صنعتی شعبے کے مسائل کو بہتر انداز میں حل کیا جائے اور صنعتی سرگرمیوں و برآمدات کو فروغ دے کر معیشت کو بحال کیا جائے۔ چیمبر کے سینئر نائب صدر فاد وحید، چیمبر کی ہائر ایجوکیشن کمیٹی کے کنوینر عدنان مختار اور دیگر وفد میں شامل تھے۔
اس وقع پر وفد سے بات چیت کرتے ہوئے بحریہ یونیورسٹی کے ریکٹر وائس ایڈ مرل (ریٹائر) آصف خلیق نے کہا کہ ان کی یونیورسٹی اسلام آباد چیمبر آف کامرس کے تعان سے طلبا میں انٹرپرینیورشپ کلچر کو فروغ دینا چاہتی ہے تا کہ وہ کاروبار کے شعبے میں آگے بڑھ سکیں اور ملک کی تعمیر و ترقی میں بہتر کردار ادا کر سکیں۔ انہوں نے طلبا کو جدید تعلیم فراہم کرنے کیلئے اپنی یونیورسٹی کی سرگرمیوں سے وفد کو آگاہ کیا۔ انہوں نے کہا کہ بحریہ یونیورسٹی آج کے نوجوانوں کو کل کے لیڈر بنانے کیلئے کوشاں ہے تا کہ وہ ملک کی معاشی ترقی میں ایک موثر کردار ادا کر سکیں۔ انہوں نے کہا کہ بحریہ یونیورسٹی طلبا کو ایک ایسا ماحول فراہم کر رہی ہے جہاں وہ جدید آئیڈیاز کو فروغ دے سکیں اور تحقیق و ترقی کی سرگرمیوں کو فروغ دے کر ملک کے معاشی مسائل کو حل کرنے مددگار ثابت ہوں۔ انہوں نے کہا کہ بحریہ یونیورسٹی آئی سی سی آئی کے ساتھ مل کر طلبا کیلئے منٹورشپ پروگرام شروع کر نے کیلئے تیار ہے تا کہ طلبا کو عملی مہارت اور تجربہ فراہم کیا جا سکے جس سے ان کا مستقبل بہتر ہو گا۔
اسلام آباد چیمبر آف کامرس اینڈ انڈسٹری کے صدر احسن ظفر بختاوری نے اس موقع پر اپنے خیالات کا اظہار کرتے ہوئے صنعتی شعبے کے مسائل کو حل کرنے کیلئے یونیورسٹی اور انڈسٹری کے درمیان قریبی روابط کی ضرورت پر زور دیا جس سے صنعتکاری اور برآمدات کو بہتر کرنے میں مدد ملے گی۔ انہوں نے کہا کہ یونیورسٹیاں بہت سا تحقیقی کام کر رہی ہیں اور انڈسٹری کے ساتھ قریبی تعاون کے ذریعے ان کا تحقیقی کام صنعتی شعبے کی ضروریات کو پورا کرنے میں معاون ثابت ہو سکتا ہے۔ انہوں نے کہا کہ پاکستان انفارمیشن ٹیکنالوجی شعبے پر بہتر توجہ دے کر اپنی آئی ٹی برآمدات میں اربوں ڈالر کا اضافہ کر سکتا ہے لہذا یونیورسٹیاں اعلیٰ معیار کے آئی ٹی شعبے کے گریجویٹ تیار کریں جو آئی ٹی برآمدات کو تیزی سے فروغ دے کر پاکستان کو ترقی و خوشحالی کی راہ پر گامزن کر سکیں۔ انہوں نے کہا کہ پاکستان کی معیشت کو بہتر کرنے کیلئے انٹرپرینیورشپ کا فروغ ضروری ہے لہذا اکیڈمیا اور انڈسٹری کے درمیان مضبوط روابط قائم کر کے ملک میں نئے انٹرپرینیورز پیدا کرنے کی طرف مثبت پیش رفت کی جا سکتی ہے۔
آئی سی سی آئی کے سینئر نائب صدر فاد وحید نے کہا کہ چیمبر اور بحریہ یونیورسٹی قریبی تعاون کے ذریعے صنعتوں کی ضروریات کے مطابق تعلیمی نصاب اور تربیتی پروگرام تیار کرنے پر توجہ دیں جس سے طلبا اور صنعتی شعبے کیلئے فائدہ مند نتائج برآمد ہوں گے۔