اسلام آباد(نیوز ڈیسک)الیکشن کے بعد حکومت سازی کیلئے پیپلزپارٹی نے تحریک انصاف سے رابطہ کرنے کا فیصلہ کرلیا۔

پیپلز پارٹی کے ذرائع کے مطابق پیپلز پارٹی کی 7 رکنی مذاکراتی کمیٹی اور رابطہ کمیٹی ہی پی ٹی آئی سے بات کرے گی ، پیپلز پارٹی پی ٹی آئی کے ساتھ مذاکرات کا راستہ اور دروازہ کھلا رکھنا چاہتی ہے ،شریک چیئر مین پیپلز پارٹی آصف زرداری پہلے ہی قومی مفاہمت میں پی ٹی آئی کو شامل کرنے کا اعلان کر چکے، پیپلزپارٹی ذرائع کے مطابق پی ٹی آئی نے مذاکرات کے لئے رابطہ کیا تو مثبت جواب دیں گے۔

دوسری جانب پیپلزپارٹی کے ایک سینیئر عہدیدار کے مطابق تحریک انصاف کے کسی مرکزی رہنما نے پیپلز پارٹی سے ابھی تک کوئی رابطہ نہیں کیا۔ ہم مذاکرات کےلیے سنجیدہ ہیں لیکن تحریک انصاف نظر نہیں آتی، پیپلز پارٹی نے مذاکرات کے دروازے کبھی بند نہیں کیے جیسے ہی باضابط رابط ہوگا آگاہ کردینگے ۔