گوجرانوالہ(سٹاف رپورٹر)سربراہ پاکستان سنی تحریک محمد شاداب رضا نقشبندی نے کہاہے کہ انتخابات کے بعدملک آئینی بحران اور غیر یقینی سیاسی صورت حال کاشکارہوگیاہے، انتخابی بے ضابطگیوں کا پوری دنیا میں مذاق بنایا جا رہاہے، انتخابات میں دھاندلی کے الزامات پر جوڈیشل کمیشن تشکیل دیا جائے،سیاسی جماعتیں متحدہوکرملک کو سیاسی اور معاشی بحران سے نکالیں،کسی غیرآئینی اور غیر جمہوری اقدام کی حمایت اور تائید نہیں کی جا سکتی،تمام سیاسی مسائل سیاسی طریقے سے حل ہونے چاہئیں،پاکستان کا مستقبل صرف نظام مصطفےٰ صلی اللہ علیہ وسلم سے وابستہ ہے،یہاں سیکولر اور لبرل ازم کی کوئی گنجائش نہیں،ملک کی نظریاتی شناخت کا ہرقیمت پرتحفظ کریں گے،دینی قوتیں اختلافات بھلاکر سیکولر ازم کا راستہ روکنے کیلئے متحد ہو جائیں، ملکی موجودہ بدحالی کا بوجھ کسی ایک جماعت پر نہیں ڈالا جا سکتا،جن سیاسی جماعتوں نے دہائیوں سے ملک اور قوم کا بیڑا غرق کیا ہے آج وہی حکومت کا بوجھ اٹھانے سے بھی قاصر ہیں، ان خیالات کا اظہار انہوں نیبھکی شریف میں تحریک صراط مستقیم کے زیر اہتمام سنی کانفرنس سے خطاب کرتے ہوئے کیا،سربراہ تحریک صراط مستقیم علامہ مفتی ڈاکٹر محمد اشرف آصف جلالی نے سنی کانفرنس میں صدارتی خطاب کرتے ہوئے کہاکہ اسلامی جمہوریہ پاکستان کو مادر پدر آزادطبقے کے رحم و کرم پر نہیں چھوڑا جا سکتا،نظام مصطفےٰ صلی اللہ علیہ وسلم کا عملی نفاذ ہی اس کی حقیقی منزل ہے،فلسطین اورمقبوضہ کشمیر کی آزادی سے پہلے اسلامی ریاستوں کے غلام سربراہان سے نجات حاصل کرنا ہوگی، علماء مشائخ اور مذہبی سکالرز کو ملک اور قوم کی علمی، فکری اور روحانی تربیت کرنی چاہیے،کرپشن، لوٹ مار، اقرباء پروری اور شخصی آمریت نے جمہوریت کا حلیہ بگاڑ دیا ہے،سودی نظام معیشت ہماری بربادی کی اصل وجہ ہے، علما و مشائخ متحد ہوکر سودی نظامِ معیشت کے خاتمہ کے لیے منظم تحریک چلائیں، علامہ پیرسید لقمان حسین شاہ،خواجہ پیر افتخار الحسن سواگی،علامہ صاحبزادہ پیرمحمد داؤد رضوی،صاحبزادہ پیرمیاں صغیراحمدکوٹلوی،سیدسجاد حسین شاہ اوردیگر مقررین کاکہناتھاکہ فلسطین میں اسرائیلی جارحیت پر اقوام متحدہ،او آئی سی،یورپی یونین،عرب لیگ اور انسانی حقوق کی تنظموں کی مجرمانہ خاموشی قابل مذمت ہے، ملک و قوم کو سیاسی اور معاشی تاریکیوں سے نکالنے کیلئے بانیان پاکستان کی اولادوں کوکرداد ادا کرنا ہوگا،نالائق اور نااہل حکمرانوں نے مہنگائی بے روزگاری دہشت گردی غربت اور جہالت کا طوق قوم کے گلے میں ڈال دیا ہے، مساجد،مدارس اور دینی درسگاہوں اورروحانی درگاہوں کو جدید علوم پڑھانے کی اشد ضرورت ہے، اصلاح معاشرت کے لیے علماء ومشائخ آگے بڑھ کر قوم کی علمی اور روحانی معاونت کریں،اس موقع پر پاکستان سنی تحریک کے صوبائی صدر وسطی پنجاب سردار محمد طاہر ڈوگر، سنی تحریک کے صوبائی صدر شمالی پنجاب محمد زاہد حبیب قادری، ابرار احمد رضوی، شیخ محمد نواز قادری،محمد جاوید بٹ، محمد آصف مغل، علامہ محمد عثمان نظامی ودیگر بھی موجودتھے ۔