اسلام آباد: وزیر اعظم کی معاون خصوصی برائے انسانی حقوق و ترقی نسواں مشعال حسین ملک نے عالمی برادری اور انسانی حقوق کی تنظیموں پر زور دیا ہے کہ وہ سفاک بھارتی افواج کی طرف سے دوران حراست عصمت دری کو جنگی ہتھیار کے طور پر استعمال کرنے کے بڑھتے ہوئے رجحان کا نوٹس لیں.
بھارتی تہاڑ جیل میں غیر قانونی قید سینئر حریت رہنما یاسین ملک کی اہلیہ مشعال ملک نے کہا کہ سفاک قابض بھارتی افواج گزشتہ سات دہائیوں سے بھارتی غیر قانونی مقبوضہ جموں و کشمیر میں خواتین کے ساتھ جنسی زیادتی کو جنگی ہتھیار کے طور پر استعمال کر رہی ہیں لیکن عالمی برادری اور عالمی طاقتوں نے اس حوالے سے مجرمانہ خاموشی اختیار کر رکھی ہے۔
انہوں نے کہا کہ بدنام زمانہ بھارتی افواج گھناؤنے جرائم میں ملوث ہیں۔ انہوں نے مزید کہا کہ بھارتی افواج کو مقبوضہ وادی میں اختلافی آوازوں کو خاموش کرنے کے لیے تمام غیر انسانی، غیر اخلاقی اور غیر قانونی کارروائیاں کرنے کا لائسنس دیا گیا ہے۔
مشعال ملک نے کہا کہ نیشنل کرائم ریکارڈ بیورو (این سی آر بی) نے بھارت کا گھناؤنا چہرہ بے نقاب کیا ہے۔ انہوں نے مزید کہا کہ این سی آر بی نے انکشاف کیا ہے کہ بھارت میں 2017 اور 2022 کے درمیان دوران حراست عصمت دری کے 275 واقعات ریکارڈ کیے گئے ہیں۔
انہوں نے مزید کہا کہ مختلف ریاستوں میں ایسے واقعات دستاویزی صورت میں موجود ہیں جو بھارتی قانون نافذ کرنے والے اداروں اور انکے مسلح افواج کا ریاستی تحفظ کی آڑ میں طاقت کے غلط استعمال کا ثبوت ہے۔
معاون خصوصی نے یاد دلایا کہ 1991 میں کنن پوش پورہ میں اجتماعی عصمت دری، شوپیاں میں دوہرا قتل اور عصمت دری اور نوجوان آصفہ بانو کی اجتماعی عصمت دری جیسے واقعات کشمیری خواتین کو درپیش ڈراؤنے صورتحال کی سب سے ہولناک مثالیں ہیں۔
انہوں نے کہا کہ این سی آر بی نے ظاہر کیا ہے کہ بھارتی خواتین بھی ذہنی طور پر بیمار بھارتی افواج سے محفوظ نہیں۔ انہوں نے مزید کہا کہ ان واقعات سےظاہر ہوتا ہے کہ بھارتی افواج انسان نہیں بلکہ درندے ہیں، جنہیں انسانیت اور خواتین کے حقوق کے بارے میں بھی کچھ نہیں معلوم۔
مشعال ملک نے کہا کہ صورتحال کی سنگینی کا اندازہ اس حقیقت سے لگایا جاسکتا ہے کہ بھارتی غیر قانونی مقبوضہ جموں وکشمیر میں 1989 سے اب تک جنسی تشدد کے 11,000 سے زیادہ واقعات رپورٹ ہوئے ہیں، انہوں نے کہا کہ اس دوران تقریباً 23,000 خواتین بیوہ اور 107,805 سے زیادہ بچے یتیم ہوئے ہیں۔
انہوں نے مزید کہا کہ بھارتی فاشسٹ طاقتیں ظلم و بربریت کی تمام حدیں پار کر سکتی ہیں لیکن وہ کشمیری آزادی پسندوں کے حوصلے پست نہیں کر سکتیں-