گوجرانوالہ( سٹاف رپورٹر )پاسبان اہلسنت پاکستان کے صدر علامہ صاحبزادہ ذکاء اللہ رضوی نے کہا ہے کہ حضور ۖ کی سیرت طیبہ تمام انسانیت کے لئے مشعل راہ ہے، عشق رسول ۖ کے بغیر ایمان نامکمل ہے اور عشق رسول کا تقاضا ہے کہ ہم اپنے اعمال کی اصلاح کریں اور آپ ۖ کی مکمل اتباع کریں ۔امت مسلمہ بالخصوص و ملک پاکستان کے تمام مسائل کا حل نظام مصطفی میں موجود ہے عشق رسول ۖ وہ قوت ہے جس سے فرقہ واریت مذہبی منافرت اور بد امنی جیسے بتوں کو پاش پاش کیا جا سکتا ہے۔ ۔ان خیالات کا اظہار انہوں نے پاسبان اہلسنت پاکستان کے زیر اہتمام مرکز اہلسنت غوثیہ رضویہ اسد کالونی میں شب توبہ کی محفل سے خطاب کرتے ہوئے کیا۔اس موقع پر صاحبزادہ پیر محمد ضیاء اللہ رضوی، حافظ محمد یوسف ،محمد شہزاد مغل،سرفراز مہر ،پیرزادہ محمد علی رضا نقشبندی،حافظ محمد مبشر حسین رضوی و دیگر مقررین نے کہا کہ دینِ اسلام ہی دنیوی و اخروی سرفرازی کا ضامن ہے اسلام ایک ایسا نظام حیات ہے کہ جس کے اپنانے سے ظلم و ستم کا خاتمہ ہو جاتا ہے۔ موجودہ مادی دور کی بے چینی سماجی اور اخلاقی برائیوں کی بنیادی وجہ حضور ۖ کی سنت مبارکہ سے دوری ہے۔اور جب تک بحیثیت مسلمان ہم اپنی زندگی قرآن و سنت کے بتائے ہوئے اصولوں کے مطابق نہیں گزاریں گے۔ ہماری مادی، فکری اور روحانی زندگیوں میں توازن قائم نہیں ہو سکتا انہوں نے کہا کہ کائنات کا وجود حضور اکرم ۖ کے طفیل سے ہے آپ ۖ کی تعلیمات کو اپناکر ہی فلاح پاسکتے ہیں۔