اسلام آباد(سٹاف رپورٹر)وزیر اعظم کی معاون خصوصی برائے انسانی حقوق و ترقی نسواں، مشعال حسین ملک نے اس بات پر زور دیا ہے کہ حقیقی عالمی امن مختلف مذاہب کے لوگوں کے اتحاد سے حاصل کیا جا سکتا ہے۔ نظریہ پاکستان کونسل کے زیر اہتمام کرسمس کیک کاٹنے کی تقریب سے خطاب کرتے ہوئے، انہوں نے مختلف مذہبی پس منظر رکھنے والے افراد کے درمیان ہم آہنگی اور افہام و تفہیم کو فروغ دینے کی اہمیت پر زور دیا۔
محترمہ سبین حسین ملک (فوکل پرسن ٹو ایس اے پی ایم)، میاں جاوید (چیئرمین نظریہ پاکستان کونسل)، منظور مسیح (ایگزیکٹیو ممبر نظریہ پاکستان کونسل)، فیصل زاہد ملک، صلاح الدین (برطانیہ میں پاکستان کے سابق ہائی کمشنر)، محترمہ نرگس اور خالد سلیری نے تقریب میں شرکت کی۔
مشعال ملک نے کہا کہ ہر مذہب محبت، قربانی اور امن کا درس دیتا ہے ۔ انہوں نے کہا کہ ویٹیکن کے پوپ سے ملاقات میں انہوں نے کثیر العقیدہ ہم آہنگی عالمی امن کے لیے کلیدی قرار دیا۔
مشعال ملک نے کہاکہ کشمیر اور فلسطین سمیت عالمی تنازعات کا حل تمام مذاہب میں سرایت محبت، امن اور ہم آہنگی کے پیغامات کی تبلیغ میں مضمر ہے۔ انہوں نے دنیا بھر میں مظلوموں کے ساتھ اظہار یکجہتی کی ضرورت پر زور دیا۔
مشعال ملک نے کہا کہ جڑانوالہ واقعے کے بعد پاکستانی معاشرے کے تمام طبقات کی جانب سے متفقہ مذمت قابل تحسین ہے۔ انہوں نے واقعے کے جواب میں حکومت کی طرف سے اٹھائے گئے اقدامات کی تعریف کی۔ انہوں نے سول سوسائٹی کے زیر اہتمام امن ریلیوں کی بھی تعریف کی اور ان اجتماعات میں عام شہریوں کی خاطر خواہ شرکت کو سراہا۔
مشعال ملک نے بھارت میں اقلیتوں پر روزانہ کی بنیاد پر ہونے والے ظلم و ستم پر گہری تشویش کا اظہار کیا۔ انہوں نے اس ظلم وستم کو ہندوستانی حکومت کے ہندوتوا سے متاثر پالیسیوں کے اثر و رسوخ سے منسوب کیا۔ انہوں نے غیر قانونی مقبوضہ جموں و کشمیر (IIOJK) میں بھارت کی طرف سے مظالم اور انسانی حقوق کی خلاف ورزیوں کی طرف بھی توجہ دلائی۔
مشعال ملک نے قیام پاکستان کی جدوجہد میں مسیحی برادری کی انمول قربانیوں کو ذکر کیا۔ انہوں نے کشمیر کاز کی حمایت کے لیے ان کی لگن کی بھی داد دی۔ انہوں نے کہا کہ 25 دسمبر کا دن پاکستان کے لیے دو خوشیاں لاتا ہے۔ 25 دسمبر بابائے قوم محمد علی جناح کا جنم دن اور کرسمس کے تہوار کا دن ہے۔
مزید پڑھیں: مشعال ملک نے نقصان دہ میٹھے مشروبات پر ٹیکسز میں اضافے کا مطالبہ کر دیا
مشعال ملک نے کیک کاٹ کر کرسمس کی تقریبات میں حصہ لیا اور سب کو کرسمس کی مبارکباد دی۔
