راولپنڈی (سٹاف رپورٹر)کشمیری عوام اپنی آزادی اور جدوجہد کی کامیابی کے لئے پاکستان کے عوام کی طرف دیکھتے ہیں۔ شیخ عبدا لمتینراولپنڈی وومن یونیورسٹی میں یوم یکجہتی ِکشمیر کے سلسلے میں خصوصی لیکچر اور کشمیر یکجہتی واک کا اہتمامطالبات ، اساتذہ اور یونیورسٹی عملے کی بھرپور شرکتر
اولپنڈی وومن یونیورسٹی میں آج یوم یکجہتی کشمیر کے سلسلے میں ایک خصوصی لیکچر اور کشمیر یکجہتی واک کا اہتمام کیا گیا۔ کل جماعتی حریت کانفرنس آزاد جموں کشمیر کے سیکرٹری جنرل اور چیئرمین کل جماعتی حریت کانفرنس مسرت عالم بٹ کے پاکستان میں نمائندہ خصوصی شیخ عبدالمتین نے یہ خصوصی لیکچر دیا۔ اپنی گفتگو کے دوران شیخ عبدالمتین نے نہ صرف تنازعہ کشمیر کی تاریخ اور اہمیت پر روشنی ڈالی بلکہ مقبوضہ وادی میں جاری بھارتی افواج اور انتظامیہ کے مظالم سے متعلق بھی تفصیل سے آگاہ کیا۔انہوں نے بتایا کہ اس وقت کشمیر میں ڈیڑھ لاکھ بچے یتیم، 23ہزار بیوہ خواتین اور ہزاروں کی تعداد میں بے نام قبروں میں مظلوم کشمیری دفن ہیں۔ وادی میں ہر دس نہتے کشمیری شہری پہ قابض فوج کا اہلکار بندوق تانے کھڑا ہے ۔ دس لاکھ سے زائد بھارتی افواج کی مقبوضہ کشمیر میں موجودگی اس بات کا ثبوت ہے کہ بھارت کی قابض فوج پچہتر سال گزرنے کے باوجود کشمیریوں کے حق خود ارادیت کو دبا نہیں سکی اور یہ قبضہ صرف طاقت کے بل بوتے پر ہے۔ انہوں نے مزید کہا کہ کشمیری عوام اپنی جدوجہد آزادی پہ کوئی سمجھوتہ نہیں کریں گے، انہوں نے اپنے لوگوں کی مسلسل حمایت اور ہمدردی پہ پاکستانی عوام کا شکریہ ادا کیا اور کہا کہ ہم اپنی آزادی کی جنگ پاکستانی عوام کے شانہ نشانہ جیتیں گے ۔لیکچر کے بعد مکالمے کا ایک سیشن ہوا جس میں حاضرین میں موجود طالبات، فیکلٹی اور انتظامیہ کے لوگوں کے کشمیر کے مسئلے سے متعلق مختلف سوالات پوچھے۔ اس کے بعد ایک یکجہتی واک کا اہتمام ہوا جس میں بڑی تعداد میں یونیورسٹی کی طالبات اساتذہ اور عملے نے شرکت کی۔ اس موقع پہ وائس چانسلر راولپنڈی وومن یونیورسٹی ڈاکٹر انیلہ کمال نے یوم یکجہتی کشمیر کی اہمیت بیان کرتے ہوئے کہا کہ پاکستان کی پوری قوم کشمیری عوام کی جدوجہد آزادی میں شانہ بشانہ کھڑی ہے۔ انہوں نے اس موقع پہ مہمان مقرر کا شکریہ ادا کیا ۔شیخ عبدالمتین کو یونیورسٹی کی یادگار شیلڈ پیش کی گئی۔ ڈائریکٹر کیو ای سی ڈاکٹر باقر، چیئرمین میڈیا ڈیپارٹمنٹ ڈاکٹر نعمان انصاری اور ڈائرکٹر اسٹوڈنٹس افیئرز مس خدیجہ بھی اس موقع پہ موجود تھے۔ تقریب کی میزبانی کے فرائض پاکستان اسٹڈیز ڈیپارٹمنٹ کے فوکل پرسن محمد شوذب عسکری نے ادا کیے۔