اسلام آباد: وزیراعظم کی معاون خصوصی برائے انسانی حقوق و ترقی نسواں مشعال حسین ملک نے عالمی برادری پر زور دیا ہے کہ وہ اپنی خاموشی توڑیں اور مودی کی قیادت میں بھارتی حکومت کی جانب سے بھارتی غیر قانونی مقبوضہ جموں وکشمیر میں جاری نسل کشی کو روکنے کے لیے فعال اقدامات کریں۔ وہ نیشنل کالج آف آرٹس (این سی اے) کے زیر اہتمام یوم یکجہتی کشمیر کے حوالے سے منعقدہ پوسٹر نمائش سے خطاب کر رہی تھیں۔ معاون خصوصی کی فوکل پرسن سبین حسین ملک بھی معاون خصوصی کے ہمراہ تھیں۔ این سی اے کے زیر اہتمام پوسٹر نمائش نے مسئلہ کشمیر کے بارے میں آگاہی اوربیداری پیدا کرنے کے لیے ایک پلیٹ فارم کا کردار ادا کیا۔
وزیر اعظم کی معاون خصوصی نے مقبوضہ جموں وکشمیر میں جاری تحریک حق خود ارادیت کے بارے میں عوام میں ہمدردی، آگاہی اور بیداری پیدا کرنے میں آرٹ کے مؤثر کردار کو اجاگر کیا۔ انہوں نے کہا کہ پوسٹر نمائش نیشنل کالج آف آرٹس کے اندر موجود منفرد فنکارانہ صلاحیتوں کی ایک جھلک ہے۔
مشعال ملک نے کہا کہ بھارتی عدلیہ آر ایس ایس کے نظریات اور مودی حکومت کی فاشسٹ پالیسیوں کے زیر اثر ہے۔ انہوں نے کشمیر کی خصوصی حیثیت کی منسوخی کے حوالے سے بھارتی سپریم کورٹ کے حالیہ فیصلے پر کڑی تنقید کی اور کشمیری سیاسی قیادت کے خلاف جانبدارانہ اور غیر منصفانہ عدالتی کارروائی کو عدالتی دہشت گردی قرار دیا۔ انہوں نے کہا کہ مودی کی پوری حکومتی مشینری انتخابی فائدہ حاصل کرنے کے لیے یاسین ملک کو جھوٹے اور من گھڑت کیسوں میں سزائے موت دینے کی سازش کر رہی ہے۔
وزیر اعظم کی معاون خصوصی نے بھارت کا بھارتی غیر قانونی مقبوضہ جموں و کشمیر میں مسلط کردہ اطلاعات اور مواصلات کی ناکہ بندی پر افسوس کا اظہار کرتے ہوئے مقبوضہ خطے میں زمینی حقائق، درست اور غیر جانبدارانہ معلومات کے حصول میں دشواری کو اجاگر کیا۔
مشعال ملک نے بھارت کی جانب سے کشمیر کے آبادیاتی تناسب کو تبدیل کرنے پر شدید تشویش کا اظہار کرتے ہوئے کہا کہ بھارت کی طرف سے 50 لاکھ غیر کشمیریوں کو کشمیری ڈومیسائل جاری کرنے کا مقصد بھارتی غیر قانونی مقبوضہ جموں وکشمیر میں اقوام متحدہ کی قراردادوں میں درج مستقبل میں ہونے والے کسی بھی رائے شماری کو متاثر کرنا ہے۔
مشعال ملک نے مختلف براعظموں میں بھارتی دہشت گردی کے نیٹ ورک کے پھیلاؤ کو اجاگر کرتے ہوئے اسے عالمی امن کے لیے خطرہ قرار دیا۔ انہوں نے امریکہ، کینیڈا اور آسٹریلیا سمیت کئی ممالک میں ٹارگٹ کلنگ میں آر ایس ایس کے دہشت گردوں کے ملوث ہونے پر روشنی ڈالی۔
وزیراعظم کی معاون خصوصی نے یوم یکجہتی کشمیر پر پوسٹر نمائش کے انعقاد میں نیشنل کالج آف آرٹس کے کردار کو سراہا۔ انہوں نے پوسٹر نمائش کو بھارتی قابض افواج کی بھارتی غیر قانونی مقبوضہ جموں و کشمیر میں بڑے پیمانے پر مظالم اور انسانی حقوق کی خلاف ورزیوں پر روشنی ڈالنے کے لئے ایک طاقتور پلیٹ فارم قرار دیا۔
