اسلام آباد (سٹاف رپورٹر)صدر فیڈریشن آف رئیلٹرز پاکستان سردار طاہر محمود نے فیڈریشن کے منعقدہ اجلاس سے خطاب کرتے ہوئے کہا کہ رئیل اسٹیٹ اور تعمیراتی صنعتیں اس مشکل وقت میں معیشت کی بحالی میں اہم کردار ادا کر سکتی ہیں، پچھلی پالیسیوں نے ہمارے ملک کو بری طرح متاثر کیا ہے، پاکستانیوں نے صرف متحدہ عرب امارات میں اربوں ڈالر کی سرمایہ کاری کی ہے. فیڈریشن کے صدر سردار طاہر محمود اور چیئرمین مسرت اعجاز خان کی زیر صدارت ہونے والے اجلاس میں آئندہ مالی سال کے بجٹ کے لیے حکمت عملی تیار کرنے اور آئی ایم ایف پروگرامر کی جانب سے درپیش چیلنجز کا تخمینہ لگانے پر غور کیا گیا جس میں رئیل اسٹیٹ سیکٹر کو متاثر کرنے والے اہم مسائل کو حل کرنے کے لئے جڑواں شہروں کے ممبران کو اکٹھا کرنے کے لئے ایک اجلاس طلب کیا گیا.اجلاس میں نائب صدر پنجاب احسن ملک، نائب صدر رانا اکرم،نائب صدر نجیب گل عباسی، سیکرٹری انفارمیشن آئی ای اے اے اسرار الحق مشوانی، کوارڈنیٹر ذوالقرنین عباسی ،ایگزیکٹو ممبر حبیب ملک و دیگر نے شرکت کی. اجلاس کے دوران یہ فیصلہ کیا گیا کہ رئیل اسٹیٹ سیکٹر پر مزید بوجھ ڈالے بغیر ریونیو بڑھانے کے طریقے تلاش کرنے میں حکومت کو سہولت اور معاونت فراہم کی جائے گی.مزید برآں اجلاس میں فیصلہ کیا گیا کہ چیمبرز اور فیڈریشن آف پاکستان چیمبرز آف کامرس اینڈ انڈسٹری (ایف پی سی سی آئی) سمیت پاکستان بھر کی تمام رئیل اسٹیٹ کمیونٹی کے ساتھ ساتھ سیاسی قیادت کو بھی شامل کیا جائے تاکہ پاکستان کے بہترین مفاد میں ہمارے اجتماعی خدشات کو موثر انداز میں آگاہ کیا جاسکے.