پاکستان انٹرنیشنل ایئرلائنز (پی آئی اے) میں اصلاحات کے بعد اس کے حصص (شئیرز) کی قدر میں 650 فیصد سے زائد اضافہ ریکارڈ کیا گیا ۔

گزشتہ چند ہفتوں میں پی آئی اے کے حصص کی قدر 4.50 روپے سے بڑھ کر 32 روپے تک پہنچ گئی ہے۔

مارکیٹ ماہرین کے مطابق پی آئی اے میں اصلاحاتی عمل کے بعد سرمایہ کاروں کے اعتماد کے باعث حصص کی قیمتوں میں اضافہ ہورہا ہے۔

پی آئی اے کے ایک شئیر کی قیمت 32 روپے ہونے کے بعد قومی ایئر لائن پاکستان کی 70 ویں بڑی شیئر ہولڈر بن گئی ہے۔

واضح رہے کہ قومی ایئرلائن کے تمام مالی خسارے اور قرضے ختم ہوچکے ہیں کیونکہ اسے نجکاری سے قبل ود ہولڈنگ کمپنی کو منتقل کردیا گیا تھا۔

حکام نے بتایا کہ پاکستان اسٹاک ایکسچینج کو پی آئی اے کی بیلنس شیٹ کی کلیئرنس کے بارے میں مطلع کردیا گیا ہے۔

حالیہ پیش رفت کے بعد، پی آئی اے ہوابازی کے شعبے میں بڑے کھلاڑیوں کے لیے سرمایہ کاری کا ایک پرکشش موقع بن گیا ہے۔

گزشتہ روز پاکستان انٹرنیشنل ایئرلائنز کی نجکاری کے لیے خریداروں سے 3 مئی تک بولیاں مانگی گئی تھیں۔

حکومت پاکستان صرف قومی ائیرلائن کے محکمہ ہوا بازی کی نجکاری کرنا چاہتی ہے اور اس کے 51 فیصد حصص فروخت کرنے میں دلچسپی رکھتی ہے جبکہ 49 فیصد شیئرز کی ملکیت حکومت کے پاس رہے گی۔