گوجرانوالہ(سٹاف رپورٹر)ایم ڈی واسا کاشان حفیظ بٹ نے کہا ہے کہ گورنمنٹ کی ہدایت کے مطابق واسا کے نا دہندہ صارفین سے پانی اور سیوریج کے بلوں کی ریکوری مہم تیزکی جا ئے اورواٹر سپلائی وسیوریج کے بلوں کی عدم ادائیگی کی صورت میں کنکشنز منقطع کردیئے جائیں۔مزیدکہا کہ ڈیفالٹرز سے کسی قسم کی نرمی نہیں برتی جا ئے گی۔ منیجنگ ڈائریکٹرواسا کاشان حفیظ بٹ نے واسا کے نادہندہ صارفین کے ذمہ دیرینہ واجبات پر گہری تشویش کا اظہار کرتے ہوئے متعلقہ افسران کو ہدایت کی کہ واسا کے بلوں کی تقسیم اور ریکوری کے نظام میں مزید بہتری لائی جائے تاکہ بقایا جات کی وصولی میں اضافہ ممکن ہو۔ ایم ڈی واسا کا کہنا کہ گورنمنٹ کی ہدایت کے مطابق واسا کا ریونیو بڑھانے کے لئے واسا کی ٹیمیں ریکوری کے لئے علاقہ میں متحرک ہیں اورتقریبا 40 کروڑ روپے کے ٹا پ نادہندگان کی فہرستیں مرتب کر لی گئیں ہیں اور ان کے خلاف بڑا ایکشن شروع کردیا گیا ہے۔ناد ہندگان سے ہر ممکن ریکوری کے لئے واسا کی ریکوری ٹیمیں انتھک محنت کررہی ہیں اور ضرورت پڑنے پر پولیس کی بھی مدد لی جارہی ہے۔ ایم ڈی واسا کاشان حفیظ بٹ نے عوام سے اپیل کی ہے کہ واسا سے متعلقہ اپنے واجبات بروقت ادا کریں تاکہ انہیں معیاری سروسز کی فراہمی ممکن ہو سکے۔ انہوں نے کہا کہ شہری واسا کی سروسز حا صل کرتے ہیں لیکن پانی و سیوریج بلزکی ادائیگی نہیں کرتے ۔ جو بلز کی عدم ادائیگی پرعادی ڈیفالٹر بن چکے تھے ان کے کنکشن منقطع کردئیے گئے بقایا جات کی ریکوری تک ان کے کنکشن بحال نہیں کئے جائیں گے۔ریونیو میں بہترین کارکردگی دکھانے والے افسران و ملازمین کو انعامات دیئے جائیں گے ۔ تمام سٹاف اسی محنت اور لگن سے کام کرے اور واسا کا نام روشن کرے۔انہوں نے ہدایت کی کہ ریکوری کے حوالے سے پیش رفت سے متعلق رپورٹ انہیں ہر دو ہفتہ کے بعد فراہم کی جائے تاکہ متعلقہ افسران کی کارکردگی کاجائزہ لیا جاسکے۔انہوں نے افسران سے کہا کہ وہ واسا کے صارفین کو بہترین سروسز کی فراہمی کیلئے متحرک کردارادا کریں اور اس ضمن میں سیوریج سسٹم فعال اور واٹر سپلائی میں تعطل نہیں آناچاہیے۔