اسلام آبا د(نیوز ڈیسک)اسلام آبا دکیپیٹل پولیس سکیورٹی ڈویژن میں تعینات افسران و جوانوں کی کارکردگی اور ذہنی صلاحیتوں کو بہتر بنانے کے لیے تین روزہ ورک شاپ کا انعقاد کیا گیا،اس سلسلہ میں خصوصی نفسیاتی امتحانی کمیٹی بھی تشکیل دی گئی،ورک شاپ کے انعقاد کا مقصد امن و عامہ کی صورت حال کے پیش نظر افسران و جوانوں کے نفسیاتی امتحانوںکے ذریعے کارکردگی کو مزید بہتر بنانا اور ان کو درپیش مسائل کو حل کرنا ہے۔
تفصیلات کے مطابق اسلام آباد کیپیٹل سٹی پولیس آفیسر ڈاکٹر اکبر نا صر خاں کے خصوصی احکامات کی روشنی میں اسلام آباد کیپیٹل پولیس کے افسران و جوانوں کی استعداد کا ر کو بڑھانے کا سلسلہ جاری ہے،اس سلسلہ میں سکیورٹی ڈویژن میں تعینات افسران و جوانوں کی کارکردگی اور ذہنی صلاحیتوں کو بہتر بنانے کے لیے تین روزہ ورک شاپ کا انعقاد کیا گیا،اس حوالے سے خصوصی نفسیاتی کمیٹی بھی تشکیل دی گئی ،کمیٹی میں ایس ایس پی سکیورٹی ڈویژن کو چیئر مین تعینات کیا گیا جبکہ ایس پی انسداد دہشتگردی ڈیپارٹمنٹ،ایس پی ہیڈکوارٹرزاور طبعی نفسیاتی ماہرین کمیٹی کے ممبران ہیں، تین روزہ ورکشاپ میں سکیورٹی ڈویژن میں تعینات افسران و جوانوں نے حصہ لیا،ورکشاپ کے اختتام پر افسران و ملازمان کو درپیش مسائل کے حل کیلئے سفارشات مرتب کی گئی، اس موقع پر سی پی او سکیورٹی ڈویژن نے کہا کہ اسلام آباد کیپیٹل پولیس شہریوں کے جان و مال کے تحفظ کو یقینی بنانے کیلئے ہمہ وقت مصروف عمل ہیں، وفاقی دارلحکومت اسلام آباد میں امن و عامہ کی صورتحال کو برقرار رکھنا ایک بڑا چیلنج ہے ،جس سے افسران و جوانوں کو ناصرف جسمانی بلکہ ذہنی مشکلات کا بھی سامنا کرنا پڑتاہے، جس کو مدنظر رکھتے ہوئے افسران و جوانوں کے نفسیاتی امتحان شروع کرنے کا فیصلہ کیا گیا ہے، جس کا مقصد امن و عامہ کی صورت حال کے پیش نظر افسران و جوانوں کے نفسیاتی امتحانوں کے ذریعے کارکردگی کو مزید بہتر بنانا اور درپیش مسائل کو حل کرنا ہے۔