گوجرانوالہ(سٹاف رپورٹر)ایس ایس پی آپریشن فراز احمد نے کہا ہے کہ اعلی و معیاری تعلیم بیشک انسان کو کامیابی کی منازل طے کرواتی ہے لیکن درحقیقت تعلیم انسانی کامیابی کے ساتھ ساتھ اخلاقی اقدار اور شخصیت کے خوبصورت نکھار کا نام بھی ہے جس نے اس میدان میں کامیابی حاصل کی دراصل اسی نے تعلیم میں اعلی مقام حاصل کیا۔پاکستان کی شرح خواندگی میں اضافہ اور ریکارڈ کامیابیوں میں نجی تعلیمی اداروں کی اہمیت میں روز بروز اضافہ ہو رہا ہے جو جدید نظام تعلیم ،ماہر و تجربہ کار اساتذہ کی محنت کا ثمر ہے ان خیالات کا اظہار انہوں نے دی ایجوکیٹرز رئوف کیمپس سیٹلائٹ ٹائون کی افتتاحی تقریب سے خطاب کرتے ہوئے کیا۔تقریب سے اسسٹنٹ کمشنر ریونیو منظور حسین،سابق میئر شیخ ثروت اکرام، امیدوار صوبائی اسمبلی حلقہ 60 سابق ایم پی اے عمران خالد بٹ، رئوف کیمپس کے اونرز میر عمران ایڈووکیٹ،بابر صدیق،ایڈیشنل ڈائریکٹر ایجوکیشن سکینڈری نزہت فاطمہ اعوان ،امیدوار صوبائی اسمبلی حلقہ 60 معظم رئوف ،جنرل سیکرٹری بار حافظ وزیر علی ملک، سیاسی سماجی شخصیت خواجہ وقارحسین ، عرفان چاند بٹ، صا حبزادہ آصف معصومی،موٹیوشنل سپیکر یاسر عرفات،رانا حفیظ اللہ و دیگرنے بھی خطاب کیا۔افتتاحی تقریب میں صدر کلاتھ مارکیٹ بورڈ خواجہ انوار احمد شیخ،سینئر صحافی عمر بٹ ،خواجہ حنیف سمیت دیگر ممتاز سیاسی ،سماجی،علمی ادبی شخصیات نے کثیر تعداد میں شرکت کی۔ رئوف کیمپس کے اونر میر عمران ایڈووکیٹ کا کہنا تھا کہ سکینڈری سکول امتحانات ہوں یا اعلی ڈگری کے،دی ایجوکیٹرز کے طلبا و طالبات نے ہمیشہ اپنی محنت اور لگن سے کامیابیوں کے نئے ریکارڈ قائم کیے اور آج یہی وجہ ہے کہ والدین کی بڑی تعداد اپنے بچوں کے بہتر مستقبل کے لئے دی ایجوکیٹرز کا ہی انتخاب کر رہی ہے ۔انہوں نے کہا کہ اساتذہ کی درس وتدریس کے میدان میں محنت اور سرپرستی سے جہاں ہمارے طلبہ نے ماضی کی روایات کو برقرار رکھتے ہوئے کامیابیاں حاصل کیں اسے طرح ہم نصابی سرگرمیو ں ،سپورٹس کے شعبوں میں بھی اپنا لوہا منوایا اور صوبائی سطح کے مقابلوں میں اولین پوزیشنیں حاصل کیں ۔ اس موقع پر طالبات نے ویلکم ٹیبلو بھی پیش کئے۔ قبل ازیں ایس ایس پی اپریشن فراز احمد نے فیتہ کاٹ کر رئوف کیمپس کا باقاعدہ افتتاح کیا۔