گوجرانوالہ(سٹاف رپورٹر)یوم یکجہتی کشمیر کے حوالے سے کپس کالج فار گرلز سیٹلائٹ ٹان کیمپس گوجرانوا لہ کے زیر اہتمام کالج میں خصوصی تقریب کا انعقاد کیا گیا اور کشمیری عوام سے اظہار یکجہتی کے لیے ریلی نکالی گئی ۔ اس پروگرام میں کالج کے جملہ سٹاف اور طلبا و طالبات نے بھرپور شرکت کی۔طالبات نے پلے کارڈ اور بینر اٹھا رکھے تھے جن پر کشمیر کے آزادی کے حوالے سے مطالبات درج تھے۔طالبات نے کشمیری عوام کے حق میں نعرے لگا کر اپنے جذبات کا اظہار کیا۔ اس تقریب کا مقصد مظلوم کشمیری عوام کے مطالبات کی حمایت، اظہار یکجہتی اور بھارت کے غیر قانونی تسلط کے خلاف آواز بلند کرنا اور طالبات کو مسئلہ کشمیر کے حوالے سے آگاہی فراہم کرنا تھا۔تقریب کا آغاز تلاوت کلامِ پاک سے کیا گیا۔ اس موقع پر پرنسپل پروفیسر صبا اکرام نے طالبات کو کشمیر ایشو کی اہمیت، موجودہ صورتحال کے بار ے میں آگاہ کیا۔ پرنسپل پروفیسر صبا اکرام اور دیگر مقررین نے کہا کہ پوری دنیا کے سامنے بھارت کا اصل چہرہ بے نقاب ہو چکا ہے۔ انہوں نے کہا کہ بھارتی مظالم کی وجہ سے کشمیر کا مسئلہ پوری دنیا میں ایک نمایاں حیثیت اختیار کر چکا ہے اوراب اقوام عالم کے علاوہ اس کے علاوہ کوئی حل نہیں کہ وہ اس مسئلہ کے حل کے لیے کردار ادا کریں۔ اس موقع پر طالبات نے کشمیر کے حوالے سے ٹیبلو بھی پیش کئے۔ آخر میں مقبوضہ جموں وکشمیر کی آزادی اور تمام امت مسلمہ کی خیر و عافیت ، بھائی چارے ، اتحاد اور امن و سلامتی کی دعا کی گئی۔