گوجرانوالہ(سٹاف رپورٹر)پاکستان تحریک انصاف خواتین ونگ کے زیر اہتمام گوجرانوالہ نوشہرہ روڈ الراہی ہسپتال چوک میں پی ٹی آئی کی خواتین کارکنوں نے الیکشن میں دھاندلی کے خلاف زبردست احتجاجی مظاہرہ کیا ۔مظاہرے کی قیادت پاکستان تحریک انصاف کی راہنما سابق ایم پی اے نیئر مرتضیٰ لون نے کی ۔خواتین اور نوجوانوں نے ہاتھوں میں بینر ، پارٹی پرچم ، و عمران خان کی تصاویر اور پلے کارڈ اٹھا رکھے تھے۔ جن پر دھاندلی کے خلاف الیکشن کمیشن آراو، ڈی آر او کے خلاف مختلف نعرے ، پاکستان بچائو، کون بچائے گا پاکستان عمران خان، ساڈا حق ایتھے رکھ،مینڈیٹ چور نامنظور و دیگر نعرے درج تھے۔ مظاہرین سے خطاب کرتے ہوئے سابق ایم پی اے نیئر مرتضیٰ لون نے کہا کہ قوم کے آئینی اور جمہوری حق پر ڈکیتی کے خلاف لوگ خوف کا بت توڑ کر باہر نکل رہے ہیں۔ ہم کسی کے خوف میں نہیں آئیں گے، بات کرنا ہمارا حق ہے، کمشنر راولپنڈی کا اعتراف ہماری تاریخ کا ایک بہت بڑا واقعہ ہے۔ انہوں نے کہا کہ پی ٹی آئی کے حمایت یافتہ امیدواروں کی جیت کو ہار میں بدلنے کے لئے ہر ہتھکنڈہ استعمال کیا گیا ۔ پی ٹی آئی کے امیدوار بھاری اکثریت سے جیتے ہیں لیکن رات کے اندھیرے میں فارم 47 میں رزلٹ تبدیل کر دیئے گئے۔پی ٹی آئی نے الیکشن کمیشن آف پاکستان کے سربراہ سکندر سلطان راجہ سے مستعفی ہونے کا بھی مطالبہ کیا ہے۔ نیئر مرتضیٰ لون نے کہا کہ میں عوام کے ساتھ ہوں اور ہم حق کی آواز بلند کرتے رہیں گے، احتجاج کرنے والوں میں مرد و خواتین اور بڑی تعداد میں نوجوان شامل تھے ۔ ریلی میں خواتین اور نوجوانوں نے پارٹی پرچم لہرائے اور دھاندلی کے خلاف نعرے بازی کی۔ نیئر مرتضیٰ نے مزید کہا کہ گوجرانوالہ میں پی ٹی آئی کے حمایت یافتہ امیدوار عوام کے ووٹوں سے بھاری اکثریت سے فارم 45 کے مطابق جیت چکے ہیں ان کی کامیابی کو ہار میں تبدیل کرنے کے لئے ووٹ کی بجائے نوٹ کو عزت دیکر اتفرا تفری کا ماحول پیدا کیا گیا ہے جس سے عوام اور ان کے ووٹرز ، بہی خواہوں میں بے چینی پائی جاتی ہے عوام کے ووٹوں سے کامیاب ہونے والے امیدواروں کی کامیابی کو ہار میں تبدیل کرکے حقیقی نمائندوں کا راستہ روک کر عوام میں کھوئی ہوئی ساکھ کو بحال نہیں کیا جاسکتا۔مظاہرین نے مطالبہ کیا کہ فارم 45 کے مطابق کامیابی کے نوٹیفکیشن جاری کرکے عوامی رائے کا احترام کیا جائے بصورت دیگر احتجاج کو مزید وسعت دیتے ہوئے شدید سخت احتجاج کریں گے تاکہ عوام کے مینڈیٹ پر ڈاکہ ڈالنے کی کسی کو اجازت نہ دی جاسکیں اور ہم اپنا حق لیکر رہیں گے۔ مظاہرین اپنے مطالبات کے حق میں نعرہ بازی کرتے ہوئے پر امن طور پر منتشر ہوگئے۔