گوجرانوالہ(سٹاف رپورٹر)الحاج صوفی غلام سرور گوندل جلالی کے ختم چہلم کے موقع پر تحریک لبیک یارسول اللہ صلی اللہ علیک وسلم و تحریک صراط مستقیم کے زیر اہتمام ”تاریخی سنی کانفرنس بھکھی شریف” کا انعقاد کیا گیا۔ کانفرنس کی صدارت پیر آف سواگ شریف حضرت خواجہ محمد افتخار الحسن مجددی نے کی جبکہ حضرت ڈاکٹر میاں صغیر احمد کوٹلوی پیر آف کوٹلہ شریف مہمان خصوصی تھے۔ سنی کانفرنس کے موقع پر مرکز صراط مستقیم کے 95 علماء کرام و مفتیانِ عظام کی دستارِ فضیلت کی گئی۔ ”سنی کانفرنس” سے خطاب کرتے ہوئے تحریک لبیک یارسول اللہ صلی اللہ علیک وسلم کے سربراہ اور تحریک صراط مستقیم کے بانی ڈاکٹر محمد اشرف آصف جلالی نے کہا: آل و اصحابِ رسول ۖ کی محبت ذاتِ رسول ۖ کی وساطت سے فرض ہے۔ آل و اصحابِ رسول ۖ کی تمام تر عظمتیں نسبتِ رسول اللہ ۖ کی وجہ سے ہیں۔ عقیدۂ ختم نبوت اور عقیدۂ ختم معصومیت دین اسلام کی اساس اور بنیاد ہیں۔ عقائد کی پختگی اور اعمال کی درستگی ایک کامل مسلمان کا زیور ہیں۔ الحاج صوفی غلام سرور جلالی ایک مثالی معلم اور عظیم مصلح تھے۔ ہر قسم کی بداعتقادی کے سامنے بند باندھنے کے لیے سنی کانفرنس بھرپور کردار ادا کرے گی۔ کانفرنس سے شیخ الحدیث مفتی سعید قمر سیالوی، مفتی محمد لطف اللہ بصیر پوری، صاحبزادہ محمد داؤد رضوی، مولانا شاداب رضا نقشبندی، مولانا محمد یوسف رضوی، مفتی محمد بشیر القادری، صاحبزادہ محمد امین اللہ نبیل سیالوی، مولانا محمد صدیق مصحفی نے بھی خطاب کیا جبکہ شیخ الحدیث حافظ محمد نذیر احمد جلالی، پیر ڈاکٹر سید محمد عبد اللہ شاہ خوارزمی، پیر سید محمد نعیم شاہ بخاری، پیر سید سجاد حسین شاہ، شیخ الحدیث مولانا محمد ارشاد احمد جلالی، مفتی محمد زاہد نعمانی، مفتی محمد عبد العلیم جلالی، مفتی محمد رفیق جلالی، مولانا محمد زاہد حبیب قادری، مولانا محمد عدیل جلالی، مولانا محمد ادریس جلالی، حافظ محمد ذوہیب جلالی سمیت ہزاروں لوگوں نے شرکت کی۔ کانفرنس کے اختتام پر صوفی غلام سرور جلالی، الحاج محمد احسن جلالی، مفتی محمد عابد جلالی کے لیے خصوصی طور پر ایصالِ ثواب کیا گیا۔