گوجرانوالہ (آئی ایم ایم نیوز) سٹی پولیس آفیسرمحمد ایاز سلیم نے ضلع بھر میں ڈکیتوں،چوروں اور جرائم پیشہ افراد کے خلاف سخت کاروائیاں کرنے کے احکامات جاری کر رکھے ہیں۔انہی احکامات کے پیش نظرڈی ایس پی سی آئی اے اعجاز احمد کی زیرِنگرانی انچارج سی آئی اے انسپکٹر عنصر موہل و دیگران پرمشتمل پولیس ٹیم نے اعلیٰ کارکردگی کا مظاہرہ کرتے ہوئے ڈکیتی کی متعدد وارداتوں میں ملوث عزیز پٹھان ڈکیت گینگ کے چار ارکان کو گرفتار کر کے دوران تفتیش ان کے قبضہ سے تین لاکھ روپے نقدی برآمد کر لیے۔ گرفتار کیے گئے ملزمان میں عزیز، احسان اللہ، یوسف، اور مجیب الرحمان شامل ہیں۔ ابتدائی تفتیش میں گینگ کے ملزمان نے انکشاف کیا کہ انہوں نے گوجرانوالہ اور اس کے مضافات میں ڈکیتی اور چوری کی متعدد وارداتیں کی ہیں۔ ملزمان نے مزید انکشاف کیا کہ وہ رات کی تاریکی کا فائدہ اٹھا کر شہریوں کو لوٹ لیتے اوراسلحہ کے زور پر موٹر سائیکل سواروں سے نقدی اورموبائل چھین کر فرار ہو جاتے۔ ڈکیتوں اور چوروں کے خلاف بھر پور کاروائیاں کرنے پر علاقہ مکینوں کا پولیس کو زبردست خراج تحسین۔ اس موقع پر سی پی او کا کہنا ہے کہ ڈکیتوں، چوروں اور مجرمانہ ذہن رکھنے والے سماج دشمن عناصر کے ساتھ آہنی ہاتھوں سے نمٹتے ہوئے شہریوں کو امن کی فضا فراہم کریں گے۔