گوجرانوالہ( آئی ایم ایم)تنظیمات اہل سنت کے زیر اہتمام جامع مسجد نور مدینہ المعروف حاجی عبدالستار والی جگنہ بازار سیالکوٹ روڈ میں شان اہل بیت و عظمت صحابہ کانفرنس منعقد کی گئی شرکا، کانفرنس سے خطاب کرتے ہوئے سجادہ نشین درگاہ حضرت ابوالبیان پیر صاحبزادہ محمد رفیق احمد مجددی نے کہا کہ امام عالی مقام امام حسین کی حق و صداقت کا پرچم صبح قیامت تک لہراتا رہے گا, باطل قوتیں یزید کی طرح روز مرتی رہیں گی، عالم اسلام کو کفر کے مقابلے میں ڈٹ جانا چاہیے، مسلمانوں کی دنیا بھر میں رسوائی بے بسی اور لاچارگی تعلیمات مصطفوی صلی اللہ علیہ وسلم سے روح گردانی کا نتیجہ ہے ۔اس موقع پر مولانا محمد امتیاز سلطانی، علامہ شاہد رسول رضوی، محمد زاہد حبیب قادری، چوہدری محمد اقبال ہنجرا، صاحبزادہ حافظ محمد احمد نورانی، چوہدری شازب علی چٹھہ، ملک محمد منیب اعوان، ملک نصیر احمد نقشبندی ، راشد مغل،ڈاکٹر عبدالرشید انصاری، محمد دائود مصطفی و دیگر نے کہا کہ صحابہ کرام اور اہل بیت کی تعلیمات اور زندگیاں قیامت تک اہل ایمان کے لئے بہترین نمونہ ہیں۔
صحابہ کرام نے نہ صرف بہترین انسان معاشرے کی فلاح و بہبود میں حصہ لینے کے لئے کھلی کتاب ہیں بلکہ بطور حکمران دنیا کے حکمرانوں اور صاحب اقتدار کے لئے بھی بہترین رول ماڈل ہیں۔ عالم اسلام سے لے کر انسانی معاشرے تک پھیلی بے چینی، بے سکونی، انتہا پسندی اور برائیوں کی اصل وجہ خلافت راشدہ سے روح گردانی ہے، آج بھی اگر ہم صحابہ کرام اور اہل بیت کے طرز زندگی، طرز حکمرانی، تعلیمات و سیرت پر عمل پیرا ہوں تو دنیا کا کوئی کونہ مشرف بہ اسلام ہونے سے بچ نہیں سکتا۔ پوری دنیا میں اس وقت معاشی بدحالی ہے جس کا سبب ایک اہل مغرب مذہبی انتہا پسندی کو فروغ دینا چاہتے ہیں، مغرب کی مذہبی شدت پسندی سے نفرتوں کو عروج اور تقویت ملے گی.
تہذیبی ثقافتوں کا تصادم کسی صورت بھی دنیا کے لیے قابل قبول نہیں ہو سکتا، ثقافتی نسلی اور مذہبی انتہا پسندی کو فروغ دینے کی مغربی سازش کو ہر صورت ناکام بنانا ہوگا، دنیا بھر میں پھیلے ہوئے مزہب میں صرف اسلام ہی ہر ایک دوسرے مذہب کا تقدس بحال رکھتا ہے اور تحفظ کرتا ہے۔ کانفرنس میں اس عزم کا عائدہ کیا گیا کہ عقیدہ ختم نبوت، عظمت صحابہ کرام اور شان اہل بیت پر کسی قسم کی آنچ نہیں آنے دی جائے گی۔ جامع مسجد نور مدینہ المعروف حاجی عبدالستار نقشبندی والی سیالکوٹ روڈ جگنہ بازارمیں ہونے والی شان اہلبیت و عظمت صحابہ کانفرنس میں شرکاء کی ایک بہت بڑی تعداد مسجد کے علاوہ مسجد کے باہر تقاریر سنتی رہی اس موقع پر پولیس کی طرف سے سکیورٹی کے خصوصی انتظامات بھی کئے گئے تھے۔