اسلام آباد(آئی ایم ایم)وفاقی وزیر مواصلات،نجکاری اور سرمایہ کاری بورڈ عبدالعلیم خان نے نیشنل ہائی وے اتھارٹی کے اعلیٰ سطحی اجلاس کی صدارت کرتے ہوئے شاہراہوں کی تعمیر اور نئے منصوبوں کی نشاندہی کیلئے ترجیحات کا تعین کرنے کی ہدایت کر دی ہے۔انہوں نے واضح کیا شاہراہوں اور سڑکوں کی تعمیر کے معیار پر کوئی سمجھوتہ نہیں ہوگا،چیئرمین نیشنل ہائی وے اتھارٹی تعمیراتی منصوبوں کے لئے ایماندار اور با صلاحیت افسران کا انتخاب کریں۔ انہوں نے مزید کہا کہ اصل مسئلہ فنڈز کا ہے،صرف پیسہ خرچ کرنا کوئی کمال نہیں،سرکاری محکموں کو اپنی آمدن بڑھانے کے لئے اقدامات کرنا ہوں گے۔ وفاقی وزیر مواصلات عبدالعلیم خان نے مزید کہا کہ نیشنل ہائی وے اتھارٹی کے افسران اپنے تجربے اور مہارت کا فائدہ اٹھاتے ہوئے دیگر ممالک میں منصوبوں پر کام کرنے کا ماڈل تیار کریں تاکہ این ایچ اے کی سالانہ آمدن میں اضافہ ہوسکے۔ شمالی علاقہ جات میں ہائی ویز اور سڑکوں کی تعمیر کے حوالے سے وفاقی وزیر مواصلات عبدالعلیم خان نے کہا کہ گلگت سے خنجراب موٹروے کی تعمیر چین اور وسط ایشیائی ریاستوں تک رسائی کا باعث بن کر”گیم چینجز”ثابت ہو سکتی ہے، اسی طرح گوادر تک سڑک اور ریل کے ذریعے زمینی رابطہ انتہائی اہمیت کا حامل ہے تاکہ تجارتی سرگرمیوں کو فروغ دیا جا سکے۔اجلاس میں وفاقی وزیر کو این ایچ اے کے گلگت سے چترا ل، شندور، مانسہرہ اور دیگر سڑکوں کی تعمیر سمیت گلگت پیکج پر تفصیلی بریفنگ دی گئی جس پر وفاقی وزیر عبدالعلیم خان نے کہا کہ شاہراہوں پر سکیورٹی اور سہولتیں بڑھانے سے ٹورسٹ اور سفر کرنے والے شہریوں کی تعداد میں بھی اضافہ ہوگا۔ اجلاس میں بتایا گیا کہ اس سال این ایچ اے کو 23ارب روپے کے اضافی فنڈز حاصل ہوں گے،نئے ٹول پلازوں کی تعمیر اور اُن کے فنکشنل ہونے سمیت چاروں صوبوں میں این ایچ اے کے منصوبوں پر تفصیلی غور وخوض کیا گیا اور بعض اہم فیصلوں کی منظوری دی گئی۔

آسٹریلیا کے ہائی کمشنر نیل ہاکنز نے وفاقی وزیر برائے نجکاری، سرمایہ کاری بورڈ اور مواصلات عبدالعلیم خان سے ملاقات کی جس میں پرائیویٹائزیشن کے جاری عمل، سرمایہ کاری کے امور اور دو طرفہ تعلقات کے فروغ پر بات چیت کی گئی۔ وفاقی وزیر عبدالعلیم خان کا کہنا تھا کہ خسارے میں چلنے والے اداروں کی نجکاری بہت ضروری ہے کیونکہ اس سے ملکی معیشت نقصان میں تھی۔انہوں نے کہا کہ یہ امر طے ہے کہ کاروباری سرگرمیاں حکومت کا نہیں،نجی شعبے کا کام ہے۔ وفاقی وزیر عبدالعلیم خان کا مزید کہنا تھا کہ پی آئی اے، ہاؤس بلڈنگ فنانس کارپوریشن اور فرسٹ ویمن بینک سمیت مختلف اداروں کی نجکاری ہو رہی ہے جبکہ خسارے میں چلنے والے اداروں کو پرائیویٹ سیکٹر کے زیر انتظام کر کے منافع بخش بنایاجا سکتا ہے۔ عبدالعلیم خان نے آسٹریلیا کے ہائی کمشنر نیل ہاکنز کو بتایا کہ پاکستان میں غیر ملکی سرمایہ کاری کی خاطر خواہ گنجائش موجود ہے جس کے لئے مختلف ملکوں سے حوصلہ افزا بات چیت ہو رہی ہے۔ آسٹریلوی ہائی کمشنر نیل ہاکنز نے وفاقی وزیر اور صدر استحکام پاکستان پارٹی عبدالعلیم خان سے باہمی دلچسپی کے مختلف امور اور سرمایہ کاری کے حوالے سے گفتگو کی اور انہیں آسٹریلوی حکومت کی طرف سے مکمل تعاون کا یقین دلایا۔