اسلام آباد/ کراچی (عامر رفیق بٹ)پاکستان پیپلز پارٹی کے سیکرٹری جنرل سینیٹر تاج حیدر نےکہاہے کہ جو لوگ عام انتخابات کو ملتوی کرنے کا مطالبہ کر رہے ہیں وہ پوری قوم کے حوصلے پست کر رہے ہیں اور دہشت گردی کی گھناؤنی کارروائیوں میں ملوث مٹھی بھر افراد کی حوصلہ افزائی کر رہے ہیں۔ یہ قوم، اس کے آئین اور اس کے جمہوری نظام کو چھوٹے دہشت گرد گروہوں کے ہاتھوں یرغمال نہیں بنایا جا سکتا۔
جمہوریت اور دہشت گردی ایک ساتھ نہیں چل سکتے۔ پاکستان پیپلز پارٹی کی حکومت نے پاکستان کے بڑے علاقوں کو آزاد کرایا تھا جن پر مشرف آمریت کے دوران دہشت گرد گروہوں نے قبضہ کر رکھا تھا۔ بعد میں پی ایم ایل (ن) حکومت کی طرف سے مذاکرات کی آڑ میں ان گروپوں کے خلاف آپریشن بند کرنے سے شکست خوردہ دہشت گرد تنظیموں کو دوبارہ منظم ہونے اور دوبارہ مسلح ہونے اور ہمارے امن و سلامتی کے لیے ایک ممکنہ خطرے کے طور پر ایک بار پھر اٹھنے کا موقع ملا۔
سینیٹر تاج حیدر نے کہا کہ پی ٹی آئی کی آنے والی حکومت نے دہشت گرد گروہوں کو خوش کرنے میں ایک قدم اور آگے بڑھایا جب اس نے ہزاروں مسلح دہشت گردوں کو پاکستان کی سرزمین پر اپنے کیمپ قائم کرنے کی دعوت دی۔ روزانہ کی بنیاد پر ہمارے جوانوں کی مسلسل شہادتیں پی ٹی آئی حکومت کی دہشت گردی کی اس سہولت کاری کا براہ راست نتیجہ ہیں۔
ہمارے شہید جوانوں کے خون کاقرض کہ ہم دہشت گردی کے خلاف جنگ میں ان کے ساتھ کندھے سے کندھا ملا کر کھڑے رہیں اور خوف، مایوسی اور غیر یقینی کی فضا نہ پھیلائیں جو جمہوریت کو پٹڑی سے اتارنے کی مذموم کوششوں میں انتہا پسندوں اور دہشت گرد گروہوں کی براہ راست مدد کرتے ہیں۔
خوف،فرسٹریشن اور مایوسی ہماری قومی زندگی، امن اور سلامتی کے لیے زہر ہیں۔ پاکستان پیپلز پارٹی جب سے محنت کش طبقے اور پسماندہ طبقات کے لیے ایک سیاسی پلیٹ فارم کے طور پر قائم ہوئی ہے، انتہا پسندی اور دہشت گردی کے خلاف حوصلے کے ساتھ کھڑی ہے۔ انتخابی عمل کے کسی بھی قسم کے التوا پر بحث کو ہمیشہ کے لیے دفن کر کے آئین اور جمہوریت کو غالب رہنے دیں۔