راولپنڈی(سٹاف رپورٹر)ریجنل پولیس آفیسر راولپنڈی ریجن سید خرم علی کااوپن ڈور پالیسی کے تحت کھلی کچہری کا انعقاد، کھلی کچہری میں راولپنڈی ریجن کے شہریوں کی درخواستوں پر فوری ازالے کے لیے متعلقہ افسران کو فوری کارروائی و انکوائری کے احکامات جاری کیے گئے۔کھلی کچہری کے انعقاد سے پولیسنگ کے معیار میں مزید بہتری لانے سمیت شہریوں کو بلاتعطل انصاف کی فراہمی کو یقینی بنایا جارہا ہے۔
تفصیلات کے مطابق ریجنل پولیس آفیسر راولپنڈی ریجن سید خرم علی نے اوپن ڈور پالیسی کے تحت ریجنل دفتر میں کھلی کچہر ی کا انعقاد کیا۔کھلی کچہری میں راولپنڈی ریجن کے اضلاع سے آئے شہریوں نے تبدیلی تفتیش و دیگر شکایات کے ازالے کے لیے درخواستیں پیش کیں،کھلی کچہری میں درخواست گزار نرگس جہاں سکنہ گوجرخان کے تھانہ جاتلی میں درج مقدمہ کی انکوائری کے لیے ایس پی صدر ڈویژن کو احکامات جاری کیے گئے، طارق محمود سکنہ ضلع چکوال نے درخواست دی کہ پلاٹ پر ملزمان نے قبضہ کر لیا ہے جس پر ڈی پی او چکوال کو فوری کارروائی کے احکامات جاری کیے گئے۔عبد الحمید سکنہ اسلام آباد نے درخواست دی کہ تھانہ وارث خان میں درج مقدمہ بے بنیاد ہے اس کی انکوائری کروائی جائے جس پر ایس ڈی پی او وارث خان کو فوری انکوائری کے احکامات جاری کیے گئے۔ارشد محمود سکنہ فتح جنگ اٹک نے تھانہ فتح جنگ میں درج مقدمہ کی دوسری تبدیلی تفتیش کی استدعا کی جس پر ایس ایس پی آر آئی بی کو فوری کارروائی کے احکامات جاری کیے گئے۔محمد امتیاز سکنہ ٹینچ بھاٹہ راولپنڈی نے درخواست دی کہ پلاٹ سے تعمیراتی سامان چوری ہوا لیکن درخواست کے باوجود مقدمہ درج نہ ہو ا جس پر اے ایس پی صدر سرکل کو فوری انکوائری کے احکامات جاری کیے گئے، دیگر متفرق نوعیت کی درخواستوں پر متعلقہ افسران کو فوری انکوائری و کارروائی کے احکامات جاری کرتے ہوئے مجوزہ ٹائم فریم میں رپورٹ بھجوانے کے احکامات جاری کیے گئے۔اس موقع پر آر پی او راولپنڈی ریجن سید خرم علی نے گفتگو کرتے ہوئے کہا کہ تھانہ جات کی سطح پر عوام کی فوری دادرسی کے لیے اقدامات کیے جارہے ہیں، کھلی کچہری کے انعقاد سے پولیسنگ کے معیار میں مزید بہتری لانے سمیت شہریوں کو فوری او ر بلاتعطل انصاف کی فراہمی کو یقینی بنایا جارہا ہے۔

مزید پڑھیں: واہ کینٹ پولیس کی اہم کارروائی،دوہرے قتل کے مقدمہ میں مطلوب اشتہاری مجرم گرفتار