اسلام آباد (کامرس ڈیسک) اسلام آباد چیمبر آف کامرس اینڈ انڈسٹری کے قائم مقام صدر فاد وحید نے کہا کہ پاکستان میں بجلی اور گیس کی مہنگی قیمت صنعتی سرگرمیوں کی ترقی کی راہ میں ایک بڑی رکاوٹ ہے اور انہوں نے اس بات پر زور دیا کہ پاکستان اور ترکمانستان کو چاہیے کہ ترکمانستان-افغانستان-پاکستان ۔انڈیا (ٹاپی) گیس پائپ لائن منصوبے پر کام تیز کریں تا کہ یہ اہم منصوبہ جلد مکمل ہو جس سے پاکستان میں صنعتی شعبے کو سستی توانائی ملے گی اور ملک میں صنعت کاری کو بہتر فروغ ملے گا۔ان خیالات کا اظہار انہوں نے پاکستان میں ترکمانستان کے اعزازی قونصلر محمد یعقوب تابانی سے بات چیت کرتے ہوئے کیا جنہوں نے اپنے بیٹے حاتم تابانی کے ہمراہ اسلام آباد چیمبر آف کامرس کا دورہ کیا اور پاکستان و ترکمانستان کے درمیان کاروباری رتعلقات کو بہتر کرنے کے امور پر فاد وحید کے ساتھ تبادلہ خیال کیا۔
فاد وحید نے کہا کہ پاکستان اور ترکمانستان دوطرفہ تجارتی اور اقتصادی تعلقات کو بہتر کرنے پر توجہ دیں کیونکہ دونوں ممالک متعدد شعبوں میں ایک دوسرے کے ساتھ کاروبار کرنے کی عمدہ صلاحیت رکھتے ہیں۔ انہوں نے اس بات پر زور دیا کہ پاکستان اور ترکمانستان بزنس کمیونٹی کے لیے آسان ویزا پالیسی متعارف کرائیں تاکہ تجارتی وفود کے متواتر تبادلے کر کے دونوں ممالک کے درمیان دو طرفہ تجارت کو فروغ دینے کی نئی راہیں تلاش کی جائیں۔ انہوں نے کہا کہ دونوں ممالک کی موجودہ سخت ویزا پالیسی باہمی کاروباری تعلقات کو فروغ دینے میں ایک بڑی رکاوٹ ہے جس پر نظرثانی کی اشد ضرورت ہے۔ انہوں نے پاکستان اور وسطی ایشیائی ممالک کے درمیان فضائی، سڑک اور ریلوے رابطوں کے قیام کی ضرورت پر زور دیا تاکہ ان ممالک کے ساتھ پاکستان کی تجارت اور برآمدات کومزید بہتر کیا جا سکے۔
پاکستان میں ترکمانستان کے اعزازی قونصلر محمد یعقوب تابانی نے اس موقع پر اپنے خیالات کا اظہار کرتے ہوئے کہا کہ پاکستان اور ترکمانستان کے درمیان باہمی کاروباری تعلقات کو بہتر کرنے کے عمدہ مواقع موجود ہیں جن سے فائدہ اٹھایا جائے۔ انہوں نے کہا کہ ترکمانستان توانائی سے مالا مال ملک ہے اور پاکستان کی توانائی کی ضروریات کو باآسانی پوری کر سکتا ہے۔ انہوں نے کہا کہ ترکمانستان سستی بجلی پیدا کر رہا ہے جو پاکستان کو اپنی صنعت اور بڑھتی ہوئی آبادی کی توانائی کی ضروریات کو پورا کرنے کے لیے فراہم کی جا سکتی ہے۔ انہوں نے کہا کہ ایک لینڈ لاک ملک ہونے کی وجہ سے ترکمانستان سمندر کے ذریعے بیرونی دنیا تک بہتر رسائی چاہتا ہے اور پاکستان اسے کراچی اور گوادر بندرگاہوں کے ذریعے مختصر ترین راستہ فراہم کرتا ہے۔ لہذا، دونوں ممالک کے درمیان قریبی تعاون ان کے لیے متعدد فائدہ مند نتائج پیدا کرے گا۔
انجینئر اظہر الاسلام ظفر، قائم مقام سینئر نائب صدر اور احمد خان قائم مقام نائب صدر آئی سی سی آئی نے پاکستان اور ترکمانستان کے درمیان براہ راست فضائی روابط کے قیام کی ضرورت پر زور دیا جس سے دونوں دونوں ممالک کے باہمی کاروباری اور سرمایہ کاری کے تعلقات کو بہترفروغ دینے میں بہت مدد ملے گی۔
مزید پڑھیں: روپے کی قدر میں اضافے کا سلسلہ تھم گیا، ڈالر مہنگا ہوگیا
