اسلام آباد/راو لپنڈی (سٹاف رپورٹر)غزہ میں روایتی جنگ نہیں نسل کشی ہورہی ہے، غزہ میں اسرائیل کی دوبارہ بمباری اقوام متحدہ اور عالمی رہنمائوں کی ناکامی ہے۔ غزہ پر عرب ممالک،ایران اورترکیہ کا رویہ سمجھ سے بالاتر ہے،ثابت ہوگیاہے کہ مسئلہ فلسطین اور کشمیر قراردادوں سے حل نہیں ہوں گے،ملک میں دہشت گردی کے واقعات میں اضافہ تشویشناک ہے ،چلاس واقعہ بھی اسی سلسلے کی کڑی ہے ۔جمعیت علما اہل حدیث کے چیئرمین قاضی عبدالقدیرخاموش دیگررہنمائوںحاجی عبدالغفارسلفی،علامہ عبدالخالق فریدی،،ثنا اللہ ڈار،ابوبکرقدوسی ،حاجی محمدایوب ،،حافظ عبدالباسط ودیگرنے اپنے مشترکہ بیان میں کہاہے کہ غزہ کے معاملے پرمسلم ممالک ،اقوام متحدہ اورعالمی رہنماء ناکام ہوگئے ہیں غزہ میں ایک مرتبہ پھرقتل عام جاری ہے اومسلم حکمرانوں نے پھرسے خاموشی اختیارکرلی ہے سلامتی کونسل کی اپنے فیصلوں کو نافذ کرنے میں ناکامی غزہ پر جاری بمباری کی وجہ ہے۔ عالمی برادری اسرائیل کی جانب سے فلسطین میں بچوں، خواتین اور معصوم لوگوں کے قتل عام کو رکوانے میں ناکام ہوگئی ، پوری دنیا میں مسلمان اور انسانیت کے ہمدرد کروڑوں انسان جنگ کی وجہ سے شدید اضطراب میں ہیں۔افسوسناک امریہ ہے کہ غزہ میں قتل عام کے دوران 61صحافی قتل مار ے جاچکے ہیں مگربین الاقوامی نشریاتی ادارے بھی اس ظلم کے خلاف آوازاٹھانے سے قاصرہیں اسی طرح آج تک کسی جنگ میں بچوں کی اتنی اموات نہیں ہوئیں جتنی غزہ میں ہوئیں مگرانسانی حقوق کے ادارے اوراین جی اوزخاموشی اختیارکی ہوئی ہیں غزہ کے مسئلے پر مسلم حکمرانوں اور عوام کا تعلق امنقطع ہوچکاہے ، عوام اس ظلم وبربریت کے خلاف سراپااحتجاج ہیں مگرحکمرانوں پرسکوت مرگ طاری ہے ۔انہوں نے مزیدکہاکہ اس وقت پوری انسانیت،انسانیت دشمن طاقتوں کے نرغے میں ہے دور حاضرکی استعماری قوتیں عالم اسلام کی دینی ، علمی، ثقافتی، تہذیبی روایات اورآزادی و استقلال کو ختم کرنے اور وسائل کو تباہ کرنے کے درپے ہیںفلسطین تاکشمیراقوام متحدہ کی قراردادیں بے معنی ہوکررہے گئی ہیں اسرائیل اورانڈیاان قراردادوں کوکوئی اہمیت نہیں دے رہا اقوام متحدہ بھی مسلمانوں کے مسائل میں حل کرنے میں ناکام ہوچکاہے اسرائیل ایک دہشت گردریاست ہے جوعالمی طاقتوں کی ایماء پرفلسطینیوں کاقتل عام کررہاہے ۔